Ocannu puru, comenti de traditzioni, a Mòguru funt contendi is diis po incingiai sa Fiera de s'Artesania Artìstica de Sardigna, arribada a s'editzioni nùmeru 59.
Sa manifestatzioni at a inghitzai sàbudu chi benit, 8 de austu, e s'at a podi abisitai finas a su 6 de cabudanni.
Is artisanus ant a essi in totu 91 e me in is spratzus de su Tzentru Fiera de su Tapetu ant a ammostai e bendi is mellus manifatus de totu is setoris de s'artesania artìstica de s'ìsula, de sa ceràmica a su tessìngiu, de s'orificeria a sa linna, passendi po is arresojas, is traballus de peddi, arricamus, stèrgiu de fenu, traballus de imbìdriu e cosa de papai e de bufai. At a essi unu eventu fatu in seguresa, arrispetendi is mesuras po non si atacai apari su Covid-19 e s'at a assegurai sa mellus tutela de is abisitadoris po lassai atesu ònnia arriscu de si ddu atacai apari. Su sìndigu Sandro Broccia, s’assessora de s'Istrutzioni Pùblica e de s'Artesania, Luisa Broccia, su diretori artìsticu de sa rassinna, Marcello Muru e sa presidentessa de sa cooperativa "Su Trobasciu" de Mòguru, Wilda Scanu, ant ammostau a is giornalistas su programma e is novas de s'atobiada prus de importu de su setori in Sardigna (s'annu passau is abisitadoris fiant giai 13 milla).
Nùmerus de sa de 59 editzionis:
91 funt is chi ammostant spratzius in 12 setoris: Ceràmica 29, Prendas 14, Linna 13, Tessìngiu 8, Arroba 8, Arresojas 4, Metallus 4, Imbìdriu 3, Peddi 2, Arricamu 2, Stèrgiu de fenu 2; Cosa de papai e bufai 2.
At a aberri totu is diis de is 10 de mangianu a is 9 oras de merii.
Is prètzius de is billetus funt popularis: intreu 3 èurus, amenguau (pipius asuta de 12 annus e mannus asuba de is 65) a 1,50 èurus. In prus nci est su billetu chi ponit impari Fiera e situ archeològicu de "Cuccurada" chi costat 5 èurus.
De su giassu internet de sa Fiera fait a prenotai is billetus e s'oràriu de bìsista.
Pagu beni, ma sa fasi de apretu de s'epidemia Covid-19 non permitit de incingiai sa Fiera comenti is annus passaus. Ocannu nci ant a essi sceti is artisanus chi ammostant, a is 9 oras de mangianu de s'8 de austu e s'at a trasmiti in direta in su situ "web" de sa Fiera http://www.fierartigianatosardegna.it/