Fiat su 1961 candu unus cantu fèminas de sa bidda e calchi maistu de linna ghiaus de su sìndigu de insaras Efisio Lippi Serra e de s’amministratzioni comunali iant cuncordau sa primu Fiera de s’Artisania Artìstica de sa Sardìnnia de Mòguru. Punna de custa mosta est imparai s’arti de su tessi traditzionali e educai su pùblicu a sa traditzioni sarda scheta, comenti si ligit in su papereddu de cumbidu de sa segundu editzioni de su 1962.
Po tres annus sa fiera duràt feti de su 19 a su 21 de maju, sa simana de sa festa de Santu Bernardinu po diventai apustis una manifestatzioni de cuindixi diis e arribai a durai fintzas tres cidas. No est mudada feti sa durata, passendi su tempus, ma fintzas su mesi de sa manifestatzioni; in is annus est passada de maju a austu po si cunfirmai in sa simana intra de s’acabbu de su mesi de argiolas e sa primu cida de austu, arribendi calchi borta fintzas a mesu austu. Est diventada unu logu de còmporas e cultura po milliàia de tùristas italianus e stràngius arranguitzaus non feti de su mari e de su soli ma fintzas de su scusòrgiu de sa traditzioni de s’ìsula. Gratzias a custu eventu Mòguru est diventau unu logu de importu mannu po s’artisania fadendi-si connòsciri in continenti e fintzas in Europa e in totu su mundu.
A cumentzai de su 1966 in prus de is artesanus mogoresus, sa fiera s’aberrit a manifaturas chi nd’arribant de ònnia parti de sa Sardìnnia. Ammànniat su spàtziu espositivu e assigurat visibilidadi manna a is òperas d’arti isulanas. In is primus tempus a partiri de su 1961 sa mosta benit cuncorada in su fàbricu bèciu de is iscolas mèdias de via Dessì acanta a sa muralla medievali de sa cresiedda de su Càrmini, apustis benit trantzida in su fàbricu mannu de is iscolas elementaris in pratza Santu Antiogu e ingui abarrat po annus e annus fadendi sucessu meda.
In su 1995 po traballus de ristruturatzioni de sa scola elementari, sa fiera torrat in via Dessì, ma in is aposentus de sa scola mèdia noba po arribai una borta po sèmpiri in su 1999 in su tzentru polifuntzionali de pratza Martiri della Libertà, nàsciu a posta po acùlliri sa fiera in spàtzius furnius e arranguitzus.