Movendi de su 31 de su mesi de argiolas e finas a domigu 2 de austu a Turri Manna ddui est "Sardigna Produxit".
Cuncordadu a manu de pari cun su Comuni de Aristanis, assessorau turismu, spetàculu e cultura, Commissioni Polìticas giovanilis, "Input On Stage" e su Tzentru Cummerciali Naturali, "Sardigna Produxit" est unu mercau, chi si fait a su merii trantzendi-sì me in is Comunus Sardus, de bontadis agrualimentaris, anca no ammancat su porceddeddu arrustu, cun is traballus de is artisanus, su mandiari de strada e is birrificieddus artigianalis.
De is 6 de meri e finas a mesunoti in mesu a is gazebus biancus e totus a bandera de is cuatru morus po s'arreconnosci mellus, s'ant a proponi is prendas de papai chi sa Sardigna ndi est arrica.
S'at a donai atentu a sa seguresa e a is normas contras a su Coronavirus, po custu tocat a si fruniri de mascarina de portai sèmpiri avatu e de poni acontessendi de no abarrai atesu s'unu de s'àteru assumancu unu metru candu s'unu cun s'àteru non bivint impari.
Sa mascarina dda ant a pediri a s'intrada, innui ant a mesurai sa callentura cun su termoscannerizadori e innui tocat a si sciacuai is manus. In ònnia barraca ddui ant a ai sinnapostus po s'apoderai atesu e unu grupu incarrigau aposta at a agiornai a sa genti posta in filera asuba a is normas contras a su Covid e at a scocai po non fai ammuntonai sa genti.