Festa de Santu Martinu - 11 de su mesi de onnisanti
Fintzas a dì de oi si allogat sa traditzioni de ponni is cannas a is gennas de domu in sa noti intra de su dexi e s'ùndixi de onnisanti po sa festa de Santu Martinu.
Una truma de giòvunus a de noti andat in su sartu acanta a sa bidda po boddiri cannas friscas de pònniri a tradora de noti in is gecas de is domus de is chi sunt nomonaus de èssiri grandu
bufadoris. Su chi spàssiat meda e chi primat calincunu est ca s'incras a mengianu po mori de sa presèntzia de canna meda, calchi genna non si aberrit e is meris depint fai traballu mannu po
èssiri de domu, incapitat ca depint fintzas sartai de sa fentana. Po cunfirmai su dìciu ca a Santu Martinu ònnia mustu est binu , si tastat su binu in totu is magazinus de sa bidda
narendi “Santu Mattiu stuppa biu” .
Sa festa arruit difati duus mesis infatu a sa serrada de is carradas e su santu benit afestau in sa simana chi si tastat su binu nou. Cun custa traditzioni est fàtzili arreconnòsciri is chi
bufant meda.
Sa dì de sa festa is fidelis acumpàngiant su santu in is bias de sa bidda po torrai apustis in sa crèsia inui si fait sa Missa. A merì si faint manifestatzionis cuncordadas de cumitaus de genti
chi nascint po s'ocasioni; si ballat, si cantat, si papat castàngia e àteru mandiari, totu acumpangiau de su binu nou cumbidau de is produtoris localis.
