Su 2 de austu nci torrat a essi s'atobiada cun su "Dromos Festival" arribau, oramai, a sa de 22 editzionis "Potzu aguantai totu fora de sa tentatzioni", aici naràt Oscar Wilde in unu dìciu nodiu cosa sua: ocannu su "Dromos Festival" at a fai de is tentatzionis su tema suu de primori.
In giai totu is culturas religiosas sa tentatzioni tenit unu sinnificau negativu: in crobetàntzia est s'Aramigu a dda intzullai e a nci arrui est pecau. Ònnia religioni at afateriau, aici, tàtigas e ainas po dda apoderai, po si nci fuiri, po si libertai e po libertai a nosu su mali, poita sa Tentatzioni est su Mali o, assumancu su barcaxu innui su mali podit sfinigai sa voluntadi e poni is peis a s'indivìduu.
Cussa etotu si fait, bida aici, prova initziàtica cun chi provat de parai faci po lompi a sa virtudi e a sa sarvesa, e a custa prova, immui o in antis, nemus si ndi bodit iscabulli.
Tentatzionis culturalis duncas, sestadas asuba de is cosas prus de importu de sa Sardigna tzentru-ocidentali- movendi de is costas suas finas a is montis suus- chi ant fai scerai unu festival chi sa punna sua est cussa de apoderai un'acàpiu forti cun su territòriu, cun su connotu populari cosa sua, sa cultura materiali e su patrimòniu enogastronòmicu suu.
Un'intrama de acàpius intra de àreas geogràficas atesu, intra de populatzionis e traditzionis culturalis diversas chi in Dromos s'ant a atopai e s'ant a poni a faci a pari, in unu movimentu in tundu, movendi de sa bidda e a sa bidda fùrriat, poita, po dda nai cun Cesare Pavese, una bidda nci bolit.
Tentatzionis destinadas a si mudai in cussu frutu proibbiu aciseri e ammajadori, chi non fait a ddi nai de no poita su secretu de sa felicidadi est arrui in tentatzioni (O.Wilde).
E Dromos - cun cussu spitzu de machìmini e de utopia positiva chi de sèmpiri s'arreconnoscit-, si ponit, duncas, sa tarea de alluxentai cussa "felicidadi" me in is territòrius e me in is comunidadis chi ddui bivint e investint in su festival, strumbullendi o torrendi a fai funtzionai cussa cunditzioni umana de "arrestàntzia", bòddiri bòddiri intra de resilièntzia e arresistèntzia.
Su 2 de austu in Mòguru s'ant a fai biri MICHAEL LEAGUE (cuntrabassu) e BILL LAURANCE (pianuforti): cumpàngius musicali e amigus meda de 15 annus e prus, Michael League e Bill Laurance funt aunius meda meda.
Po sa primu borta, ant a fai connosci branus de is repertòrius insoru fadendi una formatzioni corali a duus.
Cun in mesu su pianuforti e su cuntrabassu ma arricada de atochidus de àterus strumentus chi nisciunu si dda aspetat, custa prestatzioni arregalat un'oportunidadi rara de biri duus gènius musicalis introbeddaus meda spriculendi comenti no ant mai fatu prima.
Su cuncertu s'at a fai in sa Pratza de su Crammu a is 10:00 de noti. Su billetu costat € 15,00 finas po is chi tenint sa residèntzia.
Is billetus si podint comporai me in is puntus de bèndida de su circùitu BOX OFFICE SARDEGNA e in Mòguru in "La Nuova Posta" in sa bia Deledda n. 14 (de su lunis a sa cenàbara de is 8:30 a sa 1:30 de mangianu - tel. 349 3666751).