S'economia est prusatotu agrìcula. Is olivàrius e is bìngias ocupant àreas mannas de su territòriu, interrùmpias fatu fatu de cannedus e cresuras de figumorisca chi serbint po lacanai su logu e amparai de su bentu.
Giai in is tempus antigus si traballàt prusatotu su trigu, s'orgiu, s'aena , sa faa e àterus legùminis comenti a su pisurci e a su fasolu. Is massajus nous, apustis de sa crisi manna de su mercau de su lori, si sunt dedicaus a àteras corturas comenti su sparau, su cauli aresti, su girasoli, sa canciofa, sa tamàtiga e su trigaìndias, cun arresurtaus òtimus. De importu est fintzas sa produtzioni de fruta e birdura.
Intra de is prudutus localis nomonada est sa carnàcia, unu binu biancu apretziau meda hci si fait feti in sa baddi de su Tirsu. Sa carnàcia si produsit de sa "vitis austera". Est unu binu biancu, sicu, a colori de oru. Tenit unu fragu delicau de mèndula (su murruai). Su sabori est sciutu, callenti, velludau e agoa s'intendit pagu pagu unu sabori marigosu. Tenit una gradatzioni alcòlica de 15°/16°. Po ndi fai bessiri totu sa calidadi cosa sua, depit imbeciai asumancu 3 o 4 annus in carradas prenas, de arroli o castàngia. Si serbit a una temperadura de 6°, est bella meda comenti a aperitivu e est su binu inditau fintzas po acumpangiai unu durci.
Is terras traballadas arribant a èssiri in totu 2839 ètaras cun 483 aziendas chi si ocupant de traballai sa terra.
Sa presèntzia de su frùmini e de su stàinu de Crabas, de cussu de Is Benas e de su mari permitint de traballai a is piscadoris.
Is chi tenint berbeis a dì de oi sunt sèmpiri prus pagu e custa schèscia de traballu benit fata cun ainas prus modernas (is istaddas sunt fatas sighendi progetus, cun aposentus mannus anca ddu at
màchinas po mùlliri a manera elètrica).
Su censimentu generali de sa massarja de su 2000 narat ca ddui sunt:
- 4 aziendas cun 159 pegus de bacas
- 28 aziendas cun 6741 pegus de berbeis e crabas
- 7 aziendas cun 20 pegus de cuaddus
- 26 aziendas cun 220 pegus de procus
- 14 aziendas cun àtera schèscia de bestiàmini