Cun su patrocìniu a indonu de su Comuni de Crabas, chi dda at deliberau su 24 de trèulas sa Giunta Abis, a cabudanni de su 2020 ònnia cida s'at a fai sa de duas editzionis de "Contus in s'erba". Su progetu de letura, chi ddu at fati connosci e cuncordai s'assòtziu culturali "Libriamoci", ponit in contu cincu atòbius a cada una orixedda in su spratzu de sa bia de Colombo, chi su Comunu at cuncèdiu.
"Contus in s'erba" est destinau a is pipius de 3 finas a is 10 annus e tenit su primori de fai nasci sa crosidadi insoru e su prexu de ligi, abarrandi a s'abertu e in cumpangia. Is operadoris de s'assòtziu ant a acumpangiai is pipius in una carrera de letura e decodìfica de su lìburu, ponendi-ddis chesitus e lassendi-ddus lìberus de castiai is testus. Nci at a ai finas una parti po is arrègulas de su rispetu de is volùminis, candu si bolint manigiai.
Is fainas s'ant a fai in una parti lacanada de su parcu, arrispetendi is normas contras a su Covid-19. Is minoris s'ant a acumpangiai e ddus ant a castiai is acumpangiadoris.
In prus de cussa giai fata, nci at ai:
- su 21 de austu a is 9 oras de merii Vindice Lecis, giornalista de su gruppu "l’Espresso" e autora de romanzus de stòria antiga sarda, e "Il Cacciatore di Corsari", contu ambientau in sa gherra de pirateria in su Mediterràneu intra de s'acabbu de su Trexentus e sa primu metadi de su Cuatruxentus;
- su 23 de austu a is 9 oras de merii Davide Piras, autori de Terraba, giai bincidori de su prèmiu internatzionali de literadura Citadi de Como cun "Terra Bianca", e "Gigi Riva. Rombo di tuono", biografia romanzada de sa legenda de su Casteddu.
Su Comunu di Crabas at deliberau su patrocìniu a un'àtera initziativa de s'assòtziu culturali "Libriamoci", chi sighit su motivu condutori de favoressimentu de s'arti a 360 gradus chi at scioberau sa Giunta Abis. Su 30 de trèulas a is 7 de merii in pratza Azuni is piciocas de "Libriamoci" ant a arraxonai cun Francesca Spanu, autora de “Dentro la borsa”.