Cun inditu de s'assessorau a sa cultura de su Comuni de Aristanis movendi de su 25 de trèulas a su 20 de cabudanni s'at a aberri sa turri costera de Turri Manna.
At a essi sa Fundatzioni Aristanis comenti ocannu passau a dda sighiri assegurendi de dda aberri e a dda fai bisitai a intru.
"Sa turri costera prus manna de Sardigna at a aberri ònnia cida, de sa cenàbura a su domigu, de is 6 a is 8 de merii - decrarat s'assessori a sa cultura Massimiliano Sanna - Apustis chi abellu abellu funt torradas a atacai is fainas culturalis e is struturas musealis tzitadinas, creu de importu a torrai a aberri sa turri de Turri Manna po agiudai e cumpretai s'oferta turìstica de sa bidda, donendi balori a su patrimòniu culturali, permitendi de gosai de su sìmbulu de sa localidadi de mari aristanesa".
Sa bìsita a sa turri de Turri Manna cumpretat s'oferta culturali arrica proposta a is bisitadoris chi decidint de passai is bacàntzias in su territòriu de Aristanis; de su Museu Archeològicu Arburensu, a sa Pinacoteca Comunali Carlo Contini, a sa turri de Portixedda, a s'archìviu stòricu comunali de Aristanis e su Tzentru de Documentatzioni e Stùdiu de sa Sartìglia, struturas chi torrant in sa gestioni de sa Fundatzioni Aristanis, chi ddi ant donau sa tarea de favoressi e donai balori a is benis culturalis aristanesus.
Po ndi sciri de prus fait a tzerriai a su 078391262 o scriri a posta eletrònica a info@fondazioneoristano.it