Acanta s su stàinu de Santa Justa si nd' agatat unu àteru prus piticheddu nomonau Pauli Majori auniu a su primu a mesu de unu canali connotu comenti a Riu Nou ingiriau de una vegetatzioni fita; is 40 ètaras de su stàinu sunt amparadas agiummai de 200 ètaras de cannedu ammesturadas cun tramatzu. Tenit unu imissàriu naturali feti, s'arriu Merd'e Cani.
Custu logu duncas, su prus mannu de sa Sardìnnia permitit sa vida e sa nidada de spètzia meda de pillonis; arregordaus is pùligas, is puddas de àcua, s'anadi conca birdi, sa menga de feu, sa menga arrùbia, su crobu de mari, su mangoni e àteras gènias de pillonis.
Po sa presèntzia de custus pillonis chi bivint in logu de stàinu e po s'ambienti botànicu de grandu interessu, custa àrea est introdùsia in sa lista de in zonas ùmidas de importàntzia internatzionali, amparadas de sa cunventzioni de Ramsar. Sighendi a andai conca a giossu si podit biri fintzas su stàinu de Pauli 'e Figu inui agataus is ispètzias de animalis e de matas e froris chi eus nau asuba.