Su Comuni de Crabas at firmau unu patu de collaboratzioni cun s'assòtziu tzìvicu chi at a andai ainnantis po cincu annus e chi at a pòdi èssiri allonghiau, po torrai a nou e fai fainas de incuru e manutentzioni de is àreas birdis de Crabas. Presentis su responsàbili de s'ufìtziu tènnicu comunali Giuseppe Podda e su rapresentanti de s'assòtziu Dario Cossu. In is 15 diis de publicatzioni de su patu , comenti pedit sa lei, no est arribada osservatzioni peruna e duncas s'est andau ainnantis cun sa sutascritzioni.
Sa collaboratzioni at a pertocai su manìgiu, e sa manutentzioni de duas argioleddas mannas chi s'agatant acanta a s'intrada printzipali de su campusantu, de is argioleddas piticheddas de su marciapei in sa matessi intrada, e is duas froreras a s'intrada de su fàbricu comunali de Pratza Eleonora.
Su patu de collaboratzioni arremonat una manera de si ndi incurai de su beni comuni chi est connota beni in Sardìnnia, a partiri de sa romanidadi, comenti narat su cunsilleri de magioràntzia Carlo Carta, delegau a su decoru urbanu, parcus e àreas birdis de su comuni. “Apustis de unu annu de s'aprovu de unu regulamentu po torrai a nou, e achistiri su beni comuni, firmaus su primu patu de collaboratzioni, cun unu spìritu de si agiudai e sustenni pari pari. Dd'eus fatu cun sa punna de ammanniai su sensu de responsabilidadi in is tzitadinus e su sensu tzìvicu issoru. M'arragodu ca candu fui pipiu in bidda onniunu si ndi incuràt de s'incueddu de strada ainnantis a domu sua. Oi non pensaus prus a is cosas comunis comenti a cosas de totus. Est innoi chi depeus intrevènniri. Si auguraus duncas chi traballai impari a mesu de assòtzius fatzat nàsciri àteras initziativas. "