S'EGAS fait sciri ca cun Delìbera n.23 de s'8 de su mesi de argiolas de su 2020 su Comitau Istitutzionali de Àmbitu at aprovau "Su Regulamentu po assinnai unu BONU ìdricu de apretu po is impitadoris de su servìtziu ìdricu integrau".
S'ammitint a sa mesura de su bonu de apretu is nùcreus familiaris titularis de utèntzias deretas o is chi tenint s'arresidèntzia in un'utèntzia non dereta chi faint parti de sa tipologia "Usu in logu de domu residendi" e chi tèngiant is rechisius chi funt in s'art. 4 de su regulamentu, in prus de totu is chi:
- funt residendi in Mòguru;
- tenint unu cuntratu de frunidura de su servìtziu ìdricu integrau;
- tenint un'inditadori ISEE de immui chi non sartat sa làcana de 15.000,00 èurus;
- tenint unu inditadori ISEE de immui chi non sartat sa làcana de 20.000,00 incapitendi nùcreus assumancu cun 3 fillus a càrrigu (famìllia manna);
- s'agatant in cunditzionis econòmicas malas po mori de sa suspensioni/amenguamentu de su traballu ponendi in pràtica is mesuras po non s'atacai apari su Covid-19, chi est de nai in sa decraratzioni.
In su specìficu, s'importu de su bonu de apretu chi spetat a ònnia beneficiàriu est paris a € 50,00 a cadunu de is chi cumponint su nùcreu familiari. Is impitadoris chi tenint is rechisius ant a depi intregai a su Comunu sa dimanda, cumpilada segundu su mòdulu aposta, aintru de su 30 de cabudanni de su 2020. A sa dimanda tocat de auniri totu custus documentus:
- documentu de identidadi bàllidu de su chi fait rechesta;
- una bulleta chi pertocat s'utèntzia po usu de logu de domu residendi po chi si pedit su bonu;
- còpia de atestatzioni ISEE de immui bàllidu a sa data de intregai sa dimanda.
Po ndi sciri de prus tocat a pregontai me in is Ufìtzius de is Servìtzius Sotzialis.