S'Assessorau a s'Ambienti de su Comuni de Aristanis e su CEAS Aristanis ant incarrerau unu progetu de educatzioni ambientali "Navigaus unu mari lìmpiu".
"S'initziativa finantziada cun unu bandu de sa regioni Sardigna, nascit po sensibilizai a is chi nàvigant a su tema de s'incuinamentu de sa costa e de su mari" narat s'Assessori a s'ambienti Gianfranco Licheri.
Parti bella de su progetu s'at a fai sàbudu 25 de su mesi de argiolas candu is chi ndi tenint interessu, is collaboradoris e voluntàrius ant a limpiai su portixeddu Sa Mardini de Turri Manna.
"Ma su progetu ponit in contu una surra de partis e atzionis. Su calendàriu de is atòbius cun is chi nàvigant (velistas, is chi nàvigant po divagu, appassionaus de sport acuàticu) po fai connosci e spaniai is pràticas bellas. Impari a is chi nàvigant po divagu e a is chi ndi tenint interessu s'at a fai unu decàlogu de su chi nàvigat arrispetendi s'ambienti e s'ecologia" ponit a craru su Coordinadori de su CEAS Antonio Ricciu.
Intra de su mesi de argiolas e austu funt postas in contu duas bessidas a barca a vela (ìsula de Malu Entu, àrea de statzionamentu de sa cala de Sant'Juanni, Putzu Idu, àrea de statzionamentu de Turri de Seu) cun is operadoris de su CEAS Aristanis po una faina de informatzioni e sensibilizatzioni ambientali.
Su CEAS s'at a incurai de donai a is chi nàvigant po divagu unu pacu po navigai arrispetendi s'ambienti e s'ecologia, chi ant cunfetzionau is piciocus de su Spàtziu Giòvanus cun unus cantu ogetus eco-cumpatìbilis chi serbint a navigai est a nai una spòngia vegetali (corcoriga lufa), unu pannu po aciupai ollu e idrocarburu de sa sentina, una boràcia de allumìniu, saboni biològicu chi ant fatu is piciocus de Spàtziu Giòvanus partepari cun Legambiente, unu decàlogu adesivu de poni in barca cun 10 arrègulas po navigai arrispetendi s'ambienti e s'ecologia, materiali informativu, stèrgiu po papai biodegradàbili e cumpostàbili.
Sèmpiri aintru de su progetu "Navigaus unu mari lìmpiu" is piciocus de su CEAS Aristanis ant a fai banderinas e unu striscioni de cotoni biològicu. In prus s'ant a installai 3 postatzionis po donai informatzionis me in logus de rimòrchiu in sica e de ghetada a mari de is imbarcatzionis in su territòriu.