Finas a Cabras is canis ant a podi intrai e abarrai me in is tretus de spiàgia lìbera, castiendi-ddus is meris. Ddu at stabiliu s'ordinàntzia de su sìndigu de s'8 de trèulas. Me in is àreas in chistioni, Sant'Juanni, Maimoni e a Su Portu 'e s'Uedda, duncas, is canis ant a podi intrai e abarrai de obresci finas a scurigai de s'8 de trèulas a su 30 de cabudanni.
Ant a podi intrai sceti is canis iscritus in s'anàgrafi canina, cun totu is documentus sanidàrius a postu in chistioni de profilassi vacinali periòdica. Is animalis non depint portai cardanca, pùlixi e àterus parassitas. Depint portai sa targheta identificativa cun is datus de su meri. Is meris o is chi tenint s'animali depint essi magiorennis e ddu depint castiai comenti si depit, portendi avatu su loru, longu non prus de unu metru e mesu, e su murrali de poni candu serbit; nci ddu depint portai foras de sa spiàgia ònnia duas oras po ddu fai passillai e fai abisòngius e ddi depint fai unu oprigu po su soli. Aici etotu funt obrigaus a puliri su logu candu is canis faint is abisòngius.