Su Comuni de Aristanis, paris cun cussu de Arborea e de Tzeddiani donant cun unu lìburu su benibeniu a is pipius apena nàscius.
Is pipius de is comunus de Aristanis, Arborea e Tzeddiani, nàscius in su 2019, ant arriciu custas diis una lìtera po ddus cumbidai a sa festa chi s'at a fai su 22 de trèulas chi benit, de sa ora de is 7 de merii a is 9 oras de merii, in su giardinu de s'Hospitalis Sancti Antoni de Aristanis, e su 23 de trèulas in su spàtziu GIL de Arborea, a is 7 de merii, po arriciri in donu su lìburu "A fior di pelle" de Chiara Carminati e Massimiliano Tappari, Editzionis Lapis.
Su donu de unu lìburu a is nàscius immui rapresentat s'atentzioni chi is amministratzionis comunalis de Arborea, Aristanis e Tzeddiani tenint avatu a is generatzionis nobas.
Sa donatzioni at a tocai in totu 163 pipius nàscius in su 2019 e in atòngiu at a pertocai totu cussus nàscius in su 2020.
"Arricai is ocasionis formativas de ònnia pipiu aintru de sa famìllia, ligendi, ammanniendi aici sa curiosidadi e immaginatzioni, bolit nai a investiri castiendi atesu, a is citadinus de unu cras", narant su Sìndigu de Aristanis Andrea Lutzu e s'Assessori a sa Cultura Massimiliano Sanna.
Su progetu "La lettura est unu donu" dd'ant afateriau is bibliotecas de is comunus de Aristanis, Arborea e Tzeddiani, in s'àmbitu de su pianu natzionali Biblioraising 4, chi ddu at promòviu su Centru po su Lìburu e da Letura e s'ANCI, cun su coordinamentu de sa Scola de Fundraising de Roma.
Su donu de su lìburu s'est pòtziu fai gràtzias a s'adesioni a s'idea de su progetu de sa CRAI de is fradis Ibba, de sa Cooperativa Latte Arborea e de su Club Service Soroptimist de Aristanis.
Su lìburu s'at a donai sestau impari a opusculus cun consillus po ligi e unu bonu spesa CRAI Sardigna po comporai is produtus po s'infàntzia.
Sa Cooperativa Latte Arborea at a donai produtus de sa lìnia noba Girau pensau po is pipius.
"Su lìburu "A fior di pelle" ddu ant seberau cun cura is bibliotecàrius aintru de is propostas de "Nati per leggere" ." - Ponit a craru s'Assessori Sanna - Su programma "Nati per leggere" chi is bibliotecas ndi faint parti de diora, tenit sa tenta de favoressi sa letura in famìllia movendide sa nàscida. Una surra de circas scientìficas ammostant ca est de fundamentu a strumbullai e donai a is pipius ocasioni de svilupu de is capassidadis intelletivas e emotivas, finas de sa primu parti de sa crescida. Sa letura est una de is prus profetosas in custu sensu: ligi acanta e de sighida ndi pesat una relatzioni e intimidadi intra de mannu e pipiu, e inferrit a manera positiva in su svilupu de su linguàgiu e favoressit s'imparu afatanti de sa letura, agiudendi a manera decisa a su benèssiri de is prus pitius".