MuseoOristano torrat a cumentzai a Màssama s'atividadi e sa programmatzioni culturali apustis de una pàusa longa po mori de s'emergèntzia Coronavirus.
Si partit cun sa cunferèntzia “Màssama e is crèsias suas” cenàbura 17 de argiolas, a is 19, in sa crèsia de Santa Maria Assunta. Apustis de is saludus de su Sìndigu e Presidenti de sa Fundatzioni Aristanis Andrea Lutzu, de s’Assessori a sa Cultura Massimiliano Sanna e de su Predi de Màssama Fabio Ladu, ant a fueddai Marcello Schirru e Carla Sechi.
“Sa stòria de sa tzitadi est fintzas cussa de is fratzionis suas cun is sìmbulus culturalis e identitàrius issoru – narat su Sìndigu e Presidenti de sa Fundatzioni Aristanis Andrea Lutzu -. Po MuseoOristano est duncas de importu mannu donai valori a custus elementus. Sa Fundatzioni Aristanis e s’Assessoradu a sa Cultura torrant a cumentzai is atividadis e is atòbius de MuseoOristano cun unu cunvènniu interessanti apitzus de sa stòria de duus edifìtzius religiosus chi caraterizant sa bidda de Màssama”.
“Sighendi sa punna de aprofundiri e avalorai is monumentus archeològicus, artìsticus e architetònicus chi s'agatant in sa fratzioni de Aristanis, su caminu nostu, apustis de s'essi firmau a Silì, arribat a Màssama innui podeus abbisitai monumentus straordinàrius de s'arti religiosa isulana comenti a s'arretòriu de is Animas" narat s'Assessori a sa Cultura Massimiliano Sanna.
Ant a fueddai in custu atòbiu Marcello Schirru, professori de s’Universidadi de Casteddu chi at a chistionai prusatotu de s’architetura e de su chi iat a pòdiri espressai s'arretòriu de is Animas e sa scienti cosa sua Carla Sechi chi at a ammostai su traballu fatu in sa tesi de làurea e chi pertocat is fainas stòricas e architetònicas de sa Crèsia de Santa Maria Assunta.
“In is cidas chi benint, su caminu chi bolit promovi e avalorai is benis culturalis de su territòriu de Aristanis , at a sighiri cun is atòbius intregaus a Nuraxinieddu, Turrimanna, su Rimèdiu e su Monti Arci” acabbat su curadori de MuseoOristano Maurizio Casu.