S'istadi in Crabas cuncordat a pari cun sa mùsica e su tratenimentu culturali. S'amministratzioni Abis seberat finas ocannu de abiatzai su mesi de trèulas e de austu cun eventus musicalis e non sceti.
S'animatzioni in s'istadi at a sighiri is tres carreras mannas de Dromos, "Is gigantis de Crabas - Is balentis de Crabas a cuncertu" e "Cover band".
Giòbia 16 de trèulas atacant cun sa parti eliminatòria de sa segundu editzioni de su cuncursu musicali "cover band", innui piciocus musicistas ant a fai a trivas de pari sonendi.
S'ant a aparai, 45 minutus onniunu, me in is pratzas de Crabas, sa de Eleonora, de su Principe Piemonte, Vittorio Emanuele e Azuni. In su matessi merii su pùblicu at a teni modu de sighiri is spetàculus in prus de unu logu sendi unu spetàculus chi si trantzit e chi mudat de logu in logu abiatzendi su tzentru stòricu de sa bidda lagunali. Is atobiadas afatantis funt su 23 e su 30 de trèulas.
Su 16 de trèulas is atobiadas ant a essi a is 9 oras e mesu de merii in pratza de Eleonora, a is 10 e mesu de merii in pratza de Azuni e a is 11 e mesu de merii in pratza de Vittorio Emanuele.
A s'acabbu de ònnia serada una giuria de spertus at a decidi unu bincidori. Is tres finalistas s'ant a aparai su 6 de austu e in mesu a cussus s'at a seberai su bincidori chi s'at a minesci unu prèmiu a dinai.
Is eventus de s'istadi 2020 no acabbant innoi.
At a tocai a innantis una segunda carrera de eventus: "Is gigantis de Crabas - Is balentis de Crabas a cuncertu". Otu eventus musicalis, chi in parti "eus fatu pretziosu cun is presentadas literàrias de òperas de scriidoris sardus" decrarat s'assessori a sa programmatzioni de sa cultura, spetàculus, sport e turismu Carlo Trincas. In sa rassinna musicali ddui est finas sa presentada de lìburus de Claudia Sarritzu, Matteo Porru, Vindice Lecis e Davide Piras.
Sa primu atobiada cun sa cumbinassioni mùsica e literadura est sàbudu 18 de trèulas a is 9 oras e mesu de merii in pratza de Eleonora cun "Parole avanti" de Claudia Sarritzu. S'autora casteddàia parat faci a su tema, mai resòlviu, de is diferèntzias de gèneri, movendi de su linguàgiu. Su spriculu de is fueddus de ònnia dii e is stereòtipus ndi bessint me in is pàginas de su testu po arribai a proponi una rivolutzioni cumpartzida e in paxi de su pensu. At a chistionai cun s'autora Cristina Muntoni, scriidora e maista de sacralidadi feminina.
At a sighiri, faciora a is 10 de merii, su cuncertu de Taja Quartet, cun Thomas Sanna (pianuforti), Antonio farris (cuntrabassu), Giuseppe Joe Murgia (sassòfonu) e Alessandro Garau (bateria).
"Is gigantis de Crabas - Is balentis de Crabas a cuncertu" at a sighiri su 25 de trèulas, cun sa presentada de su lìburu "Madre ombra" de Matteo Porru, a is 9 oras in pratza de Principe de Piemonte. S'at a aparai a is 10 de merii sa mùsica de su grupu acùsticu rock a duus Mino Mereu e Alessio Lisci.
Su 1 de austu duas atobiadas cun sa mùsica: a is 9 oras e mesu su cuncertu "Mi chiamo Luca" cun Gianluca Canu, Irene Loche, Francesca Loche e Roberto Loche.
"Is gigantis de Crabas - Is balentis de Crabas a cuncertu" at a sighiri in austu:
- su 13 de austu a sa ora de is 10 de merii in pratza de Azuni cuncertu boxi e pianu Overjoyed live cun Mirella Lutzu e Antonello Langiu;
- su 16 de austu a sa ora de is 10 de merii in pratza de Vittorio Emanuele, Nicola Piredda sighit “Globe music vocal ensemble” in Universo Disney;
- su 21 de austu a is 9 oras de merii in sa pratza de Eleonora sa presentada literària de su lìburu “Il cacciatore di Corsari” de Vindice Lecis e a sighiri su cuncertu clàssicu pianu e boxi de Giuliana Porcu, Francesca Sechi, Manuela Pinna e Fabio Moi;
- su 23 de austu a is 9 oras de merii acabbat sa carrera de presentadas de lìburus “Rombo di tuono”de Davide Piras e a sighiri, faciora de is 10 de merii, su cuncertu de su grupu a duus launeddas e ghiterra de Stefano Pinna e Ignazio Cadeddu;
- serrat sa rassinna s'atobiada de su 28 de austu a is 10 de merii in pratza de Eleonora su cuncertu pianu e ghiterra Rach duo de Andrea Cutri e Fabio Moi
Diretori de is duas rassinnas "Is gigantis de Crabas - Is balentis de Crabas a cuncertu" e "Cover band" est s'artista nodiu Andrea Cutri de s'Assòtziu Sinis Waves. S'assòtziu s'at agiudicau su bandu pùblicu po sa cuncessioni de cuntributus po s'agiudu a acumpriri su programma "Eventi musicali 2020".
No est de ammancai a s'atobiada cun "Dromos festival". Ocannu a primìtziu su motivu condutori de su festival sardu mannu fiat "tentatzionis". "Apustis de su coronavirus - decrarat Salvatore Corona - ndi est bessiu tentatzionis abarrendi atesu". Sa carrera de una surra de eventus de Dromos festival s'at a fai in su tretu de Sant'Juanni e sa pratza de su stani e at a inghitzai su 7 de austu po dd'acabbai su 22.
In acòrdiu cun s'organizatzioni de Dromos su programma intreu s'at a spaniai movendi de su 15 de trèulas.