Nci at tempus finas a is mesudii de su 13 de trèulas po intregai sa rechesta e oteni unu bonu servìtziu, chi ballit non prus de 275 èurus, po teni unu contributu po is servìtzius de animatzioni po is minoris in s'istadi 2020.
Su Comuni de Crabas at publicau unu avisu pùblicu po is piciocus chi tenint sa residèntzia in Crabas, po s'iscritzioni a is servìtzius de istadi po is minoris e a sa rechesta de su bonu servìtziu.
S'Unioni de is Comunus Costa de su Sinis Terra de is Gigantis at aprovau is lìneas de inditu po atacai cun su sistema de acreditamentu po is servìtzius de istadi po minoris. At aici pigau parti a su sistema de acreditamentu regionali po is servìtzius de istadi po minoris. Su 3 de trèulas ant publicau su catàlogu de is sugetus acreditaus po fruniri is servìtzius. Si chistionat de 5 sugetus chi ant fatu propostas de atividadis diferentis, chi funt in arrèsumu me in infogràficas publicadas finas me in s'arretza sotziali virtuali e me in is canalis ufitzialis de su Comuni de Crabas.
"S'Amministratzioni puntat meda a fai acomunai apari is piciocus - decrarat s'assessori a is polìticas sotzialis Alessandra Spanu - a comenti ndi pesai e apoderai is raportus bellus e propositivus de pràticas sanas e de agiudu a sa crescida de sa sotziedadi.
Ocannu, in mesu a totu speraus in una partecipatzioni manna a is atividadis de animatzioni de istadi, comenti a primu sceda apustis de su lockdown a is esigèntzias de sotzializatzioni de is piciocus, chi tres mesis ant dèpiu poni a marolla a una parti. Po custu eus decìdiu de reconnosci unu bonu de importu".
Sa punna generali est cussa de donai balori a su tempus scapu, fai forti s'oferta de is servìtzius de istadi po is famìllias con minoris, portendi a su mellus resursas e costus. Sa manera seberada torrat paris a is esigèntzias diferentis de sa famìllia, prus de totu in s'istadi. Sa matèria est diferenti cunforma a is tareas (de giogu, de sport, de recreu), de durada (pagu cidas o totu sa stasoni, totu sa dii e mesu giorronada, totu is diis de sa cida o a dintedii).