S’Unioni de is Comunus Fenìcius favuressit s'ispaindaura de pràticas bonas po su chi pertocat sa saludi e s'ambienti. Est stètiu fatu unu progetu de Compostàgiu domèsticu chi at prevididu de comporai nr. 3.182 Compostieras de 320 lt de su valori de agiummai 120 Eurus onniuna.
Onni famìllia chi tenit unu giardinu de 50 mq a su mancu, at tentu una compostiera donendi feti 2 eurus comenti a sinnali. Impari a sa dita chi ndi boddit s'àliga,eus informau totu is tzitadinus apitzus de s'imperu de custas compostieras. Su progetu at permìtiu de ammenguai de agiummai su 10% sa cantidadi de refudus ùmidus smartius in is impiantus; is tzitadinus etotu ant gradèssiu meda custa cosa. Argunus comunus ant incorau su progetu amminguendi sa tassa apitzus de s'àliga. Impari cun is compostieras, is tzitadinus ant arriciu unu manuali po imparai a imperai sa compostiera e a fai su compostàgiu.
Onni informatzioni apitzus de custu progetu si podit pediri a s'indiritzu mail unionedeifenici@gmail.com o a su nùmeru de telèfunu de su responsàbili de su servìtziu tènnicu de s’Union de is Comunus de is Fenìcius: 0783.28.92.93.
Ma ita est su compostàgiu?
In natura is sustàntzias orgànicas chi non serbint prus a sa vida ( follas sicadas, stercu, carcassas de animalis, etc...), benint purdiadas de microrganismus e baballotis chi s'agatant in su solu e in sa matessi matèria orgànica, fintzas a otènniri àcua, anidridi carbònica, salis mineralis e humus. Fadendi su compostàgiu s'arrepitit custu protzessu a manera prus assentada e cuntrollada e in tempus redùsius. Totus scint ca is massajus nostus ddu faint de sèmpiri e fatu fatu ammesturant su materiali ùmidu e arricu de azotu, comenti a su stercu de is animalis, is arrestus de su chi si papat o de s'ortu , cun sustàntzia sicada e arrica de carbòniu comenti a sa palla o su chi s'est pudau e imperant su chi ndi bessit apustis de una simana longa de cumprimentu , comenti a ladàmini in is campus e in is ortus.