A Turrimanna arribant servìtzius nous po is residentis e is turistas chi ant a permìtiri a is turistas de gosai imprenus de sa localidadi marina.
Eus acabbau de piatzai su Bancomat de su bancu de Sardìnnia a faci de sa potacaria e lunis cumentzat a funtzionai s'Ecotzentru mòbili chi at a abarrai abertu po totu s'istadi. Su Bancomat nou chi arremprasat cussu postu duus annus innantis, giait unu servìtziu cumpletu, comenti ant domandau is residentis e is consigeris comunalis.
“Su sportellu nou at a permìtiri a turistas e aristanesus de atzedi a totu is funtzionalidadis de su bancomat – narant su Sìndigu Andrea Lutzu e s’Assessori a su Turismu Massimiliano Sanna -. Turistas e residentis no ant a dèpiri prus arribai fintzas a Aristanis po agatai unu bancomat. Iaus giai donau una primu arrespusta e oi melloraus su servìtziu gràtzias a sa disponibilidadi de su Bancu de Sardìnnia. Su sportellu bancomat e sa potacaria sunt problemas bècius e turistas e residentis boliant una solutzioni e eus infinis giau una sceda cuncreta. "
S'Ecotzentru mòbili comenti detzìdiu de s'’Assessorau a s’Ambienti, aberrit, su 6 de argiolas in su parchègiu ainantis a via de sa Pineta. At a funtzionai de su lunis a su sàbudu de is 15 a is 18 e su domìnigu de is 8 a is 11. Is residentis ant a podi portai ferru, ingombrantis piticheddus, messadura de erba e froris segaus, ollus vegetalis e mineralis, toner e cartùcias spaciadas, pillas, mexinas scadidas. .
In is diis passadas ant acabbau de pònniri is passareddas po intrai in sa spiàgia. Oristano servizi, po incàrrigu giau de su Comunu nd'at fatu undixi, ponendi a postu is àreas acanta e
ocupendi-si fintzas de ndi massai s'erba e de ndi pudai is matas.
Cun is cadiras job giadas a is gestoris de is esertzitzius e servìtzius pùblicus, sa passaredda permitit prusatotu a is disàbilis de intrai in spiàgia in manera prus sìmplitzi. Is cadiras
s'agatant in is istabilimentus Eolo, a Villa Baldino e a s’Area 39, amantendi sa spiàgia po totu su chi andat.
“Custas cadiras portant arrodas chi permitint de ddas trantziri fintzas in sa spiàgia – narat s’Assessora a is Servìtzius sotzialis Carmen Murru -. Passareddas e cadiras job sunt agiudus chi non podint mancai po permìtiri a chi tenit dificultadi a caminai de gosai de una dii de mari. Sunt cosas chi seus fadendi po favoressi unu turismu atzessìbili imprenus. ”
“Cun is 11 passareddas e cun is cadiras job po permìtiri de intrai in àcua, su Comunu de Aristanis at acabbau is interventus chi permitint de gosai de sa spiàgia de Turrimanna fintzas a disàbilis, bècius e a is chi tenint dificultadi a si movi” aciungit su Sìndigu Lutzu.
“Is initziativas chi eus pigau po Turrimanna , fintzas sa presèntzia de is banninus de unus cantu cidas tenint sa punna de fai de Turrimanna una de is àreas marinas prus seguras e frunidas de sa Sardìnnia, sighendi is istandard netzessàrius a otènniri sa Bandera Blu” narat s’Assessori a s’Ambienti Gianfranco Licheri.