Is bacas de su Sinis
Oi, sighendi a connòsciri is biddas de su Sportellu Linguìsticu ùnicu po àrea, fueddaus de unu contixeddu de sa bidda de Arriora " Is bacas de su Sinis".
Si narat ca in is tempus passaus unu massaju pobariteddu de Crabas, arròsciu de sunfriri su fàmini, andat a che una jana chi bviat in su monti po ddi domandai de ddu fai arricu.
Cummòvia de is fueddus de s'òmini, custa creadura spantosa si ndi pesat in ària ponendi-si in su cùcuru de su nuraxi inui biviat. Luegu ndi bogat de sa busciaca de su davantàlliu suu unu pùngiu
de trigu e ddu ispainat totu a giru. Lòmpius a terra, is pibionis de trigu si mudant in bacas nieddas, chi apenas aparèssias, angiant onniuna unu vitelleddu de su matessi colori. Prexau meda
meda, su massaju torrat gràtzias a sa jana e torrat a Crabas cun una cedda de bacas manna manna.
S'òmini peroa, scedau, non fait in tempus a lompi a domu chi totu is bacas fiant sparèssias.
Intendendi genti meda, fiat stètiu su tialu a ndi furai is bacas, iat aprofetau de sa peddi niedda issoru chi ddas cunfundiat cun su scuriu de sa noti. Atra genti invecis naràt ca is bacas fiant
sparèssias poita is faghìggius de is janas deghinò non abarrànt tempus meda comenti a is miràculus de is santus.
Fatu stait ca su massaju fiat torrau de sa jana a si chesciai de su chi fiat sutzèdiu. Issa insaras si ndi torrat a pesai fintzas a su cùcuru de su nuraxi e torrat a fai una àtera borta sa
maia de is pibionis de trigu. Apustis acrarat a su massaju su chi depit fai po impediri a is animalis de torrai a sparessi.
"Duncas" narat sa jana "si non bolis chi is bacas torrint a sparessi, ddas depis tocai cun sa manu e ddis fai
in sa schina su sènniu de sa gruxi". E ddi scòviat apustis cali est sa pregadoria sacra de sa gruxi chi depiat nai candu fadiat custa faina. Su massaju iat postu in menti e apitzus de sa
peddi niedda de is bacas fiat cumpàrria una gruxi bianca manna manna.
De insaras is bacas non fiant sparèssias prus. A nai sa beridadi, calincunu in Crabas narat ca su tellu de is bacas de sa jana s'agatat fintzas a dii de oi. Custu poita su de ai nau sa
pregadoria e de ai postu is manus a piztus de sa peddi insoru, ddas iat fatas immortalis.