Su de tres domìnigus de cabudanni s'afestat in Santa Justa Santa Severa. A mengianu si fait sa prufassioni chi acabbat in sa cresiedda pesada po sa santa e inui si tzèlebrat sa missa.
In is annus passaus sa festa tzivili si fadiat in sa pratza agoa de sa crèsia, immoi intamis totu s'est trantziu in sa pratza de su municìpiu.
Fintzas a pagu tempus sa cresiedda dda aberriant feti po is novenas e sa tzelebratzioni litùrgica po sa Santa e po sa Madonna de su Rimèdiu.
Immoi est aberta ònnia domìnigu po sa missa de su mengianu.
In is diis de sa festa sa Pro-Loco de Santa Justa cuncordat sa sagra de “ Is Malloreddus a sa Campidanesa ”, chi dd'ant nomenada "Aggiungi un posto a tavola".
Benint cumbidaus unu pratu de malloreddus, pani e casu e binu de su logu, totu acumpangiau de spatàculus musicalis.