Sa Càmera de Cummèrtziu est unu Enti pùblicu funtzionali, autònumu e eletivu chi, sighendi sa lei 580/93, rapresentat e si òcupat de is interessus de su sistema de impresas de su territòriu de
cumpetèntzia, e ndi prumovit su svilupu.
Sa Càmera de Cummèrtziu I.A.A. de Aristanis dd'ant fundada su 20 de onnisanti de su 1974, cuatru mesis agoa de ai fatu sa Provìntzia. In is annus s'enti s'est cunformau a sa
crèscida sotziali e econòmica de su territòriu, assigurendi in prus de is funtzionis amministrativas prevididas de sa lei cumenti a s'anàgrafi de is impresas, su manìgiu de is albus, is
servìtzius de tzertificatzioni e publitzidadi de is informatzionis, fintzas atividadis de promotzioni e cualificatzioni de su sistema de is impresas, servìtzius po arregulamentai su mercau e
stùdius econòmicus.
Insertada in sa retza de su sistema camerali in àmbitu regionali, natzionali e internatzionali, sustènnia de s'agiudu de is Assòtzius de is imprendidoris e cun sa collaboratzioni de is
sindacaus de is traballadoris e de is assòtzius de is consumadoris, sa Càmera de Cummèrtziu de Aristanis bolit èssiri una ititutzioni aberta, acanta a is atividadis econòmicas de su territòriu
chi ndi interpretat sa boxi e is valoris e ndi prumovit sa crèscida donendi servìtzius realis.
Is funtzionis suas de prus importu sunt:
- anagràficas e amministrativas: pertocant sa registratzioni e sa tzertificatzioni de is impresas; su manìgiu de is albus, rolus, elencus; su de lassai autus, tzertificaus, autorizatzionis, litzèntzias po atividadis in Itàlia e foras de stadu;
- s'agiudu a is impresas: interventus de assistèntzia, de promotzioni, de informatzioni econòmica, de formatzioni; atividadis de circa, stùdiu, elaboratzioni e ispainadura de informatzionis e datus econòmicus-statìsticus de is impresas de su territòriu; servìtzius nous po cunformai su sistema de is impresas a s'economia internatzionali noba, agiudai s'ispainadura de is istrumentus tennològicus netzessàrius po sa digitalizatzioni in is relatzionis cun s'Amministratzioni Pùblica;
- arregulai su mercau: servìtzius chi depint favoressi sa trasparèntzia e sa giustesa de su cummèrtziu po amparai is impresas e is consumadoris e chi depint ispainai règulas cumpartzidas comenti a cunditzioni essentziali po su giustu funtzionamentu de s'economia: atividadis de cuntrollu, servìtzius po arresolvi in manera extra giuditziali is brigas, po averiguai s'idoneidadi de is sugetus chi òperant in su mercau, atividadis de cuntrollu, vigilàntzia e amparu de sa calidadi de is produtus e po garantzia de is consumadoris e de is impresas.