Catodixi artistas sardus, campanus e spanniolus, cun is òperas insoru, ant a animai sa mostra de arti cuntemporanea WALLS chi de su 4 de trìulas a su 4 de mesi de ladàmini àt a èssiri ospitada in sa Pinacoteca comunali Carlo Contini de Aristanis.
S’initziativa est de s’Assessorau a sa Cultura de su Comunu de Aristanis chi, torrendi ca eja a sa proposta de gemellàgiu artìsticu cun sa tzitadi de Aversa, at intregau a sa Fondazione Oristano e a s’artista Marco Pili, cun su contributu de Chiara Schirru e Paolo Sirena, s’organizatzioni de sa mostra colletiva de arti cuntemporanea.
“WALLS est su frutu de unu gemellàgiu artìsticu collaudau e cumentzau in su mesi de maju de su 2019 in is spàtzius espositivus de Aversa chi in is cidas chi benint at a sighiri in Aristanis contendi, in is salas de sa Pinacoteca nosta, cun is òperas de is artistas sardus, campanus e spanniolus e cun sa manera insoru de ddu interpretai, su sinnificau de is murus, fisicus o idealis, chi pratzint su mundu” spiegat s’Assessori a sa Cultura Massimiliano Sanna.
Is catodixi protagonistas de sa mostra de Aristanis funt: Enzo Angiuoni, Silvano Caria, Antonio Ciraci, Marina Desogus, Francesco Giraldi, Antonio Graziano, Michele Mereu, Mari Paz Pellín Sanchez, Marco Pili, Ivo Pirisi, Gianfranco Racioppoli, Pasquale Simonetti, Enzo Trepiccione e Vittorio Vanacore.
Walls, organizada cun s’agiudu de sa Fondazione di Sardegna, de sa Fundacion Paurides e de Askòs Arte, s’at a pòdiri abisitai in sa Pinacoteca Contini, in bia S. Antoni, da su 4 de trìulas a su 4 de mesi de ladàmini, dònnia dii de is 10 a is 13 e de is 17 a is 20.