Su de ai serrau calchi spàtziu pùblicu po permìtiri a is atividadis econòmicas de si ndi torrai a strantaxai, si acumpàngiat a scioberus de mobilidadi chi tenint importàntzia manna. Sa Giunta Abis scumitit in una Crabas noba chi si movit a bellu a bellu.
Inghitzant duncas is interventus po favorèssiri una manera de si movi chi siat asiada, est a nai unu sistema de caminus po is chi bolint imperai po andai de unu logu a un àteru, mesus non motorizaus.
In bia La Marmora immoi si podit andai a pei o a bicicleta e in pratza Vittorio Emanuele e pratza Principe de Piemonte po unu tretu si podit andai feti a pei. In su tzentru stòricu, de immoi a ainantis candu si passat a màchina, at a tocai a andai prus a bellu, non prus de 30 km/h. Custa velotzidadi pertocat fintzas sa bia Risorgimento, pratza Principe di Piemonte, bia Cavallotti, pratza Vittorio Emanuele, bia Roma, viali Repubblica e pratza Stàniu Pontis.
"Circaus de propònniri unu modellu prus adatu de calidadi de vida urbana - narat su Sìndigu Andrea Abis -. In logus meda, custa fasi 2 de s'emergèntzia covid 19 est stètia s'ocasioni po cumpartziri praticas bonas apitzus de sa mobilidadi. Bolit nai abèrriri una pàgina noba in is imbitzus nostus, po favorèssiri sa sostenibilidadi. E po custu chi fadeus intrai in sa comunidadi nosta una mobilidadi asiada, pedonali e tziclàbili. E non sceti in is spostamentus chi fadeus in sa bidda ònnia dii ma fintzas in s'àmbitu de su turismu sostenìbili. Asuba de custu podeus parai meda po sa stasoni turìstica 2020."