S'Assessorau a sa Cultura e a su Spetàculu de su Comuni de Aristanis bolit agiudai a is sugetus chi intra de su mesi de argiolas e cabudanni bolint cuncordai manifestatzionis culturalis, musicalis, teatralis e de arrecreu.
Podint fai arrechesta is tzitadinus privaus chi tenint s'arresidèntzia o chi s'agatant in su Comuni, entis privaus, fundatzionis e àteras istitutzionis de caràteri privau, chi tenint personalidadi giurìdica, chi faint su traballu insoru po su prus in Aristanis, entis pùblicus, assòtzius sena de ddus ai arreconnotus e comitaus, chi faint initziativas a bantàgiu de sa populatzioni comunali. Sa cuncessioni de contributus e benefìtzius no est posta in contu po sugetus chi faint parti de s'articolatzioni polìticu-amministrativa de partidus polìticus. A chini est interessau podit intregai una proposta feti de manifestatzioni o eventu.
Su bandu e su modellu de arrechesta si podint scarrigai de su situ istitutzionali de su Comuni de Aristanis. S'istàntzia cun totu is documentus chi nci bolint at a tocai de nci ddus portai a manu a s'Ufìtziu Protocollu de su Comuni de Aristanis (pratza de Eleonora 44) o finas cun PEC a s'indiritzu istituzionale@pec.comune.oristano.it a intru de su 30 de làmpadas.