Nc'est tempus fintzas a martis 1 de cabudani 2020 po pigai parti a su prèmiu Kentzeboghes 2020, su primu cuncursu po progetus tzinematogràficus in is lìnguas de sa Sardìnnia e de ocannu abertu fintzas a is àteras lìnguas de minoria de s'Itàlia.
Est online su bandu po partzetzipai a sa III editzioni de Kentzeboghes. Fintzas a su 1 de cabudani si podint mandai is progetus po fai film e documentàrius in is lìnguas de sa Sardìnnia e de is àteras minorias linguìsticas italianas.
Si podit pigai parti a su cuncursu, organizau de s'assòtziu culturali Babel, de sa sotziedadi Umanitaria – Cineteca Sarda de Casteddu , EjaTv e Areavisuale Film, a indonu e in duas categorias: progetus tzinematogràficus in is lìnguas de Sardìnnia (sardu, algheresu, catalanu, tabarchinu, gadduresu, sassaresu) e progetus tzinematogràficus in is lìnguas minoritàrias italianas (amparadas de s’art. 2 de sa lei 482/1999).
Onni autori podit mandai prus progetus de fiction o documentàrius chi non durint prus de 30 minutus. Is film acumprius partendi de is progetus premiaus ant a èssiri presentaus in anteprima in su ‘Babel Film Festival 2021’ e prumòvius cun su ‘Babel in Tour’ o in àteras rassènnias temàticas natzionalis e internatzionalis. Is prèmius sunt duus, de 2.500 eurus, po ambaduas is categorias.