Cumentzat immoi su subraluogu de sa provìntzia in bia Tharros, po fai is valutatzionis po sa cuntzessioni de solu pùblicu a is atividadis cummertzialis chi s'agatant in cussa bia.
A partiri de ariseu àteras atividadis ant a pòdiri benefitziai de su spàtziu pùblicu po fai is fainas issoru fintza a foras de is localis. Custu po arraspundi a is dificultadis nàscias in segus a s'emergèntzia de su corona virus.
Su Comuni de Crabas est portendi ainants su pianu annuntziau giòbia 11 de làmpadas po permiti sa cuntzessioni de spàtziu pùblicu a is atividadis chi ndi fait domanda. Ant presentau s'istàntzia 24 atividadis e 13 ant giai tentu su spàtziu domandau.
Est de cenàbura passau chi su Comuni est imperendi totu is fortzas suas po pònniri is "dissuasoris" e permiìtiri de cuncordai custus logus in manera sigura.
"Eus giau una respusta a is dificultadis decraradas dae is atividadis cummertzialis cun fainas lestras e cuncretas - narat su sìndigu Andrea Abis -. e dd'eus fatu apostivigendi unu progetu de cuntzessioni de spàtziu pùblicu in presèntzia de tràficu. Intra de 10 diis eus a acabbai is traballus e eus a ponni manu fintzas a sa chistioni de sa bellesa de custus logus. "