Cabras est intru de is 28 Comunis turìsticus chi ant firmau luegus s’apellu de su sindigu de San Gimignano po sarvai custus Entis. A dii de oi is Comunis funt arribaus a 46. In is diis passadas ant imbiau s’apellu a su Premier Conte, a is presidentis de Camera e Senadu e a totu is capus grupus de su Parlamentu.
In pirìgulu su patrimòniu de s’Itàlia
“Scieus giai ca no eus a agatai in is bilàncius nostus su dinari po parai fronti a sa mèngua de is intradas de parti currenti, chi andant de su 20% fintzas a su 50% in calincuna ocurrèntzia. Su pirìgulu – aciungint is 46 sìndigus chi ant firmau s’apellu – est fintzas sa cura de su patrimòniu mannu artìsticu, culturali, monumentali, architetònicu, chi est patrimòniu de totu s’Itàlia”.
Is preguntas.
In s’abetu de sa cunversioni de su decretu lei “Rilancio” e de is situatzionis chi ant a pòdiri incapitai, is preguntas de is biddixeddas turìsticas chi ant firmau s’apellu movint faci a s’istitutzioni de “unu fundu addatu chi assegurit, assumancu in parti, sa mèngua de is intradas aunias in deretura cun su turismu fintzas de is comunis piticus”, a manera de “po garantiri unu mìnimu de dinari po si fàiri agatai strantaxus candu su tràvigu turìsticu at a torrai a partiri”.
Is 46 sìndigus pedint sa semprificatzioni de protzeduras po is investimentus localis, de affidamentus, de protzedimentus de apaltu e esecutzioni de is traballus, strumentus chi iant a cunsentiri sa circulatzioni de is pagus risursas chi abarrant. Totu acumpangiau de sa garantzia ca is Comunis ant a pòdiri fàiri fronti a disecuilìbrius de bilànciu chi nci podint èssiri po mori de is conseguèntzias de s’emergèntzia sanitària in is annus chi benit.
In s’apellu a su Guvernu is sìndigus chi ant firmau pedint chi si potzat “piscai non sceti de s’avantzu de amministratzioni de parti lìbera e destinada, ma fintzas a cussu vincolau po affrontai cun totus is strumentus sa crisi in atu, “tratènniri su gètidu Imu destinau a su Stadu” e “stabiliri una cifra mìnima de solidariedadi a su Fundu po su svilupu e sa coesioni, e candu propassau frimai su contributu de dònnia comuni”.
Funt necessàrias fintzas normas po is afitus e normas spetzìficas po sa mèngua de sa Tari a is impresas prus corpias de su lockdown.
Pirìgulu po sa stabilidadi sotziali e econòmica de is territòrius.
De is comunis turìsticus si pesat una boxi de arriolu, cumenti spiegat Andrea Marruci, sìndigu de San Gimignano: “Is intradas nostas funt a su mìnimu, est in pirìgulu sa stabilidadi sotziali e econòmica de is territòrius nostus, tanti de ammalatzai is servìtzius netzessàrius, in prus de s’amparu de is biddixeddas nostas. A su Guvernu e a su Parlamentu – aciungit – pedeus atentzioni e a non si lassai a solus. Si candidaus a èsseri protagonistas fintzas de un’economia de prossimidadi e de unu turismu nou prus sustenìbili, atentu e giuditziosu chi agatit in nosu una destinatzioni turìstica segura, capassa de chistiri cun totu s’arrispetu de is normas anti covid, prontus a sperimentai unu garbu nou de s’ospidalidadi. Seus una parti importanti de s’Itàlia, capassus de produsi arrichesa, presìdiu de su territòriu, prontus a fàiri sa parti nosta ma custa borta a solus non nci dda podeus fàiri: pedeus a su Stadu de si donai una manu po si fàiri agatai strantaxus candu at a torrai su turismu in Itàlia. Sa trasversalidadi de is adesionis a s’apellu nostu, chi at auniu sìndigus de totu s’Itàlia, testimòngiat cantu funt beras e connotas in is comunidadis nostas is temàticas postas po s’arrennou de s’economia e sa stabilidadi sotziali”.
Is Comunis chi ant firmau.
Ant firmau su primu apellu is 28 comunis de Montalcino, Montepulciano, Pienza, San Quirico d’Orcia nel Senese, Greve in Chianti (Firenze), Castiglione della Pescaia (Grosseto), Barbaresco (Cuneo), Pollica, Positano e Amalfi in provincia di Salerno, Volterra (Pisa), Porto Venere (La Spezia), San Vincenzo (Livorno), Portofino (Genova), Otranto e Castrignano del Capo, Melendugno, Porto Cesareo (Lecce), San Severino Lucano e Guardia Perticara in provincia di Potenza, Iseo (Brescia), Valsinni (Matera), Diamante (Cosenza), Città della Pieve (Perugia), Cabras (Oristano), Castelsardo (Sassari), Malfa Isola di Salina (Messina), San Vito di Cadore (Belluno), Castiglione dei Pepoli (Bologna).
Is comunis nous chi ant firmau funt: Castrignano del Capo (Lecce), Porto Cesareo (Lecce), Melendugno (Lecce), Castro (Lecce), San Quirico d’Orcia (Siena), Castiglione della Pescaia (Grosseto), Rionero in Vulture (Potenza), Papasidero (Cosenza), Quarrata (Pistoia), Buonconvento (Siena), Sarteano (Siena), Monforte d’Alba (Cuneo), Sizzano (Novara), Chiusi (Siena), Barberino del Mugello (Firenze), Nemi (Roma), Selvino (Bergamo), La Morra (Cuneo).