A Crabas si andat alestru po assinnai su logu pùblicu fintzas po fai atividadis sportivas. Sa Giunta comunali at deliberau po cuntzedi a indonu spàtzius a is assòtzius sportivus chi nd'ant a fai domanda.
A su cuadru pretòriu est publicau s'avisu pùblicu. Is atividadis ant a èssiri acumpridas sighendi sa normativa anti covid e e is lineas ghia natzionalis po s'esertzìtziu fìsicu e su sport.
Chi boleis biri s'avisu pùblicu, podeis clicai innoi.
Cali ant a èssiri is àreas?
Is ufìtzius tènnicus ant scerau is logus chi sunt prus inditaus po fai s'atividadi sportiva. Sa primu est una àrea in Pratza Stagno, àteras duas sunt in pratza Colombo, una àtera ancora in sa
scola de bia De Gasperi e po acabbai s'ùrtima in su campu sportivu de Solanas. Po biri beni is àreas e is fotografias, sighei custu link.
Is decraratzionis de s'assessori a sa programmatzioni de sa cultura, ispetàculu, sport e turismu Carlo Trincas.
“Teneus a coru sa promotzioni de s'atividadi sportiva a ònnia edadi - narat s’assessori a su sport Carlo Trincas -.Su sport est unu mesu de importu mannu po stai beni in su fìsicu e cun sa conca
e po s'atobiai cun is àterus. Duncas cumbidaus totu is crabarissus a pigai parti a custas atividadis, arrespetendi sèmpiri is normas po no ispainai su covid.