Art. 1 - Ogetu de su regulamentu
Est ogetu de disciplina de custu Regulamentu sa realizatzioni de disènnius, murales, grafitus, fatus cun calisisiat tènnica gràfica, ma a dònnia modu sceti pinturas, nomenaus de imoi innantis "murales”, asuba de murus de edifìtzius, cungiaduras fissas e asuba de calisisiat àteru spàtziu, chi si biit a foras, de propiedadi privada o pùbrica. Sa realizatzioni de is decoratzionis specificadas innantis est permìtia a is chi funt in possessu de s'autorizatzioni chi ndi fueddat s'art. 4.
Art. 2 - Printzìpius e finalidadis
Custu regulamentu bolit arreconnosci sa Street Art, giai balori a is formas differentis de s’espressioni sua e promòviri un’esercìtziu arrispetosu in su cuntestu urbanu e architetònicu comunali faendi prus arricus is spàtzius pùbricus o privaus cun percursus artìsticus, asseliendi zonas degradadas, cuntrastendi is formas de vandalismu.
Art. 3 – Destinatzioni de is spàtzius a is murales
Sa realizatzioni de murales in pitzus de superficis de edifìtzius e spàtzius de propriedadi pùbrica o privada depit èssiri autorizada cunforma e segundu is modalidadis individuadas in s’art.4. Is tzitadinus privaus interessaus, proprietàrius de is spàtzius, ant a dèpiri indicai sa disponibilidadi insoru a su Comuni e s’ant a dèpiri impenniai a lassai inalterada s'òpera chi at a èssiri realizada in su spàtziu cuntzèdiu, sarvu mudas po giusta càusa (manutentzionis, aconciaduras, etc).
Calisisiat mudadura, cambiamentu o scantzelladura de is murales at a dèpiri èssiri detzidia in acòrdiu cun s'Amministratzioni Comunali.
Art. 4 - Protzedura Preliminari a sa fasi chi autorizat
Is chi, a solus o aunius in grupus associativus, tengant interessu a praticai s'arti de is murales, siat asuba de superficis pùbricas siat privadas, depint presentai domanda po otènniri s’adduida preliminari de s'Amministratzioni Comunali a s’autorizatzioni tènnica.
Sa domanda depit cuntènniri:
1. Scheda tènnica cun sa descritzioni de su tema a ogetu de s’òpera artìstica, s'inditu de sa bia, nùmuru tzìvicu e fotografia de su muru o edifìtziu innui si bolit realizai s’interventu.
2. Datus anagràficus e Curriculum de chini fait s’interventu.
3. Decraratzioni de impènniu de chini fait s’interventu cunforma a is rechisitus nomenaus in is artìculus chi sighint.
4. Chi is esecudoris funt minoris, sutascritzioni de is genitoris o de chini ndi esercitat sa potestadi, de assuntzioni de totu is responsabilidadis po dannus a cosas o personis chi point incapitai fadendi s’interventu artìsticu.
5. Chi is murales de realizai asuba de murus de ediìtzius e spàtzius de propriedadi privada, decraratzioni de cuncessioni de is superficis po s’esecutzioni de murales de parti de su meri de s'edifitziu, cun aunia còpia de su documentu de identidadi de issu etotu in cursu de valididadi. Decraratzioni de su meri chi si impènniat a lassai inalterada s’òpera chi at a èssiri realizada, sarvu giusta càusa o mudas pigadas in acòrdiu cun s’Amministratzioni Comunali.
Sa Giunta Comunali, a pustis de su parri in favori de s’Ufìtziu tènnicu comunali, aprovat cun àutu suu su progetu de murales.
A su chi fait sa domanda o a su responsàbili in nòmini de unu grupu de richiedentis, de custus puru ocurrit sidentificatzioni pretzisa, est giau cunsensu apòsitu preliminari a s’autorizatzioni a s’interventu.
Art. 5 - Balori temporali de su cunsensu preliminari
Su cunsensu preliminari po sa realizatzioni de s’òpera balit po 12 mesis de sa data de sa deliberatzioni, sceti po is sogetus autorizaus e po su spàtziu assenniau.
Is sogetus titularis de su cunsensu preliminari non ddu podint giai a àterus.
Art. 6 - Modalidadi e iter de realizatzioni de s'òpera
S’òpera non depit cuntènniri:
- disènnius o scritas chi podint arrisurtai in cuntrastu cun is normas de s’òrdini pùbricu o chi ofendint sa pudighèntzia pùbrica, sa morali o sa personi;
- messàgius pubricitàrius crarus o pagu crarus;
- contenutus intollerantis e/o chi potzant ofèndiri is religionis, is etnias, is genias, s'orientamentu sessuali.
Ant a èssiri ammìtias sceti òperas originalis e chi non tenint deretu de s’autori. S’autori at a dèpiri sutascriri decraratzioni aposita innui renuntziat a s’esercìtziu de pretesas chi pertocant su deretu de autori.
A pustis de àiri arriciu su cunsensu preliminari, su sogetu interessau at a dèpiri providiri a cuberai is tìtulus abilitativus siat edilìtzius siat paesagìsticus prescritus segundu sa normativa in vigèntzia.
S’Amministratzioni Comunali podit pediri a is esecudoris de suspendiri e de scancellai fintzas sceti in parti, a spesas suas, òperas in cuntrastu cun cantu stabiliu de custu artìculu.
Is esecudoris de is "murales" depint operai segundu modalidadis chi non fatzant dannu a is propriedadis pùbrlcas e privadas, chi non siant de strobbu, fastìdiu o perìgulu a sa circulatzioni a pei e de is màchinas.
Tenendi s’abbisòngiu de ocupai su spàtziu pùbricu cun atrezaduras s’at a dèpiri procurai su documentu innui ant a èssiri assenniadas is prescritzionis necessàrias po garantiri sa seguresa a pei e de is bias, in prus de is maneras e is cunditzionis po s'ocupatzioni de su spàtziu etotu.
A cumpretai is dispositzionis de su regulamentu COSAP, po is operatzionis de custu Regulamentu su sogetu esecudori est dispensau de su pagamentu de is spesas po su logu pùbricu.
Po is òperas realizadas o de realizai, nudda podit èssiri pediu, ne de parti de is sogetus esecudoris ne de is chi ponint a disponimentu is spàtzius.
Is autoris de murales tenint s'òbrigu de datai, firmai e fotografai is òperas insoru. Sa documentatzioni at a dèpiri èssiri cunsenniada a s'Ufìtziu Tènnicu chi at a providiri a formai un’archìviu apositu de is òperas realizadas.
Art. 7- Durada de s'òpera
Is òperas realizadas non funt temporaneas. S’Amministratzioni Comunali disponit sa scancellatzioni o s’acontzu de cussas òperas autorizadas, ma chi tenint dannus mannus chi siant ogetu de disatinus, siat chi ocupint spàtzius de propriedadi pùbrica, siat chi ocupint spàtzius de propriedadi privada.
Art. 8 - Responsabilidadi
Su sogetu autorizau tenit sa responsàbilidadi, siat civili che penali, in cunfrontu a su Comuni e a àterus, po dònnia e calisisiat dannu chi bengat de sa realizatzioni de su murale, abarrant a càrrigu suu dònnia acumpentzu, chena deretu de arrevesa o a rimbussus de parti de su Comuni, sarvu is interventus in favori de su sogetu de parti de sotziedadi assiguradora. Po tantis, est a càrrigu de issu etotu s'adotzioni, in s'esecutzioni, de is protzedimentus e de is atentzionis necessàrias po garantiri sa saludi de is àterus. Su sogetu autorizau at a èssiri, fintzas, responsàbili de is dannus comentechisiat procuraus in sa realizatzioni de su murale a benis de propriedadi de àterus, po custu, lassat sarvu su Comuni de calisiat pretesa o strobbu. Su Comuni est esonerau de dònnia responsabilidadi po cuntestatzionis chi pertocant s'originalidadi e sa paternidadi de s'òpera e de imitatzionis o còpias de parti de àterus de s'òpera etotu.
Art. 9 - Vigilantza, santzionis e dispositzionis finalis
Su controllu de s’arrispetu de custu regulamentu est in càrrigu a su personali de s’Ufìtziu Tènnicu e a su personali de vigilantza de sa Politzia Locali.
Francu s’apricatzioni de is dispositzionis diversas de lei, po is violatzionis de is dispositzionis de custu Regulamentu si apricat sa santzioni amministrativa pecuniaria de 25 èurus a 500 èurus cunforma a s’art. 7-bis de su D.Lgs. n. 267 de su 18.08.2000 e ss.mm.ii. Is trasgressoris depint, in prus, providiri a càrrirgu insoru a torrai a su stadu de chi fiant innantis su spàtziu e is logus. Funt sarvas e impregiudicadas is santzionis a is normas penalis o specialis chi ant a èssiri acertadas.