Inghitzant oi a spainai is sachitas po arragolli s'àliga in logu de domu. A ddas donai, passendi de domu in domu, de su lunis a su sàbudu, de is mesudii a is cincu de merii, at a essi su personali incarrigau de sa Pubblior, chi s'at a fai arreconnosci a craru. Totu is famìllias de su Comuni de Aristanis, chi ndi tenint deretu, ant a arriciri tres rètulus de sachitas po s'ùmidu, unu po sa plàstica e unu po s'àliga chi non fait a seberai. Ant a movi de Toràngius, tochendi Sant'Efis e abellu abellu finas a ddas spainai in totu sa tzitadi e me in is fratzionis.