Su cumplessu nuràgicu de Pidighi si scerat intra de is medas aposentamentus chi s'agatant in unu arrogu de terra tra su Campidanu majori e sa campeda de pedra de ferru de Paulle. Arregordaus, foras de cussu de Pidighi, is nuraxis de Benas e Mura 'e Sorighes (Sabarussa), Zinnuri, Martinzanu, Santa Barbara, Mura 'e Prochilis e Mura 'e Figus (Bauladu), Nuraghe 'e Mesu (Zerfaliu), Santa Barbara, San Gemiliano e Zoppianu (Villanova Truschedu), Codas e Su Guzzu (Paulle).
Su cumplessu nuràgicu de Pidighi s'agatat aintru de su parcu Comunali chi tenit su matessi nòmini; est fatu de duus nuraxis (Pidighi e Muru Accas). A Nord-est de sa ferrovia agataus tres nuraxis minoris. Is nuraxis Pidighi e Muru Accas, innui ancora non ant fatu iscavus archeològicus, s'assimbillant meda mancai siant in unu stadu de allogamentu difarenti.
Ambadus sunt fatus de una turri printzipali e una segundària; aintru agataus duus aposentus circularis ammantaus cun bòvida a cùpola. In sa turri printzipali de Pidighi si podit biri fintzas una scala chi artziat fintzas a sus in ui s'agatàt s'aposentu de prus importu.
100 metrus a Nord-ovest de su nuraxi Muru Accas s'agatat una mitza nuràgica chi non si scerat beni poita cuada de pedra e terra.
80 metrus a Est de su nuraxi Pidighi agataus intamis "Mitza Pidighi", chi est atesu nimancu 20 metrus de s'aposentamentu. Sa mitza fiat traficada giai in su tempus prenuràgicu (ant agatau arrogus de frìcia in pedra crobina e un arrogu de ceràmica pinturau a sa manera de Ozieri de su de IV millènniu a. C.).