"Si podit presentari domanda fintzas a su 31 de Austu po pigai parti a su progetu de s'Àrea marina proteta de su Sinis", dd’at annuntziau ariseru su diretori de s'Amp Massimo Marras.
S’annu passau fuant ativus in su litorali dexi guardianus de s’arena. Sa nova de su progetu de volontariau cìvicu Sinis sentinels: at a arrespundi a manera struturada a is esigèntzias de informatzionis e sensibilizatzioni e dd’at fai in terra e in mari.
"Fintzas a oi funt arribadas 40 domandas, ma nd’abetaus àteras in is diis chi benint. Pròpriu po custu eus prorogau is tèrminis po sa presentatzioni de sa domanda", sighit a nai su diretori.
Cumenti annuntziau in sa nova de su 14 de maju, is volontàrius ant a pònniri a dispositzioni su tempus insoru - non prus pagu de dexi diis, mancai non siant a sa sighia, de su 1 de trìulas a su 15 de cabidanni - e ant a collaborai po amellorai sa calidadi de su servìtziu chi esistit giai e sperimentai formas annoadoras de interventu.