Intru de su 30 de làmpadas is istàntzias po sa cuntzessioni de is impiantus sportivus comunalis.
COMUNI DE ARISTANIS
Setori Servìtzius a sa Persona e Tzitadinàntzia, Servìtziu Sport, Turismu e Polìticas giovanilis
Avisu pùblicu po sa cuntzessioni in usu temporàneu de is impiantus sportivus comunalis a is Assòtzius po acumpriri atividadis sportivas in s'annu 2020/2021.
SU DIRIGENTI
PIGAU ATU de su Statutu de su Comuni de Aristanis.
ARREMONAU su “Regulamentu Comunali po s'imperu de is Impiantus Sportivus” aprovau cun autu de C.C. n° 61 de su 07.07.2011,publicau in su giassu istitutzionali a sa pàgina “Regulamentus” chi marcat is normas e is critèrius generalis po sa cuntzessioni issoru.
ARREMONADA sa deliberatzioni de G.C. n° 289 de su 19.12.2017 chi fueddat de “Tarifas po imperai is impiantus sportivus e is palestras scolàsticas comunalis” publicada a su Cuadru Pretòriu de su situ web istitutzionali.
PIGAU A CUNSIDERU ca s'Amministratzioni tenit cumenti a punna su de fai imperai a su mellus is impiantus sportivus dae is assòtzius chi sunt presentis in su territòriu, cun sa cussèntzia ca su sport serbit a arribai a arresultaus primorosus ma est fintzas una aina po prevenni su disàgiu e sa dispersione scolàstica, po promovi sa saludi e s'agregatzioni sotziali.
DETZIDIU ca, mancai in custa situatzioni de non seguresa dèpia a s'emergèntzia COVID-19, s'Amministratzioni bolit mandai ainnantis is protzeduras po permìtiri a is assòtzius sportivus de presentai is istàntzias po assinnai is impiantus sportivus comunalis po s'annu 2020/2021.
PRETZISAU ca si sighit custa cunditzioni de emergèntzia s'atividadi sportiva s'at a dèpiri fai respetendi is normas de seguresa po no ispainai su contàgiu de su COVID-19 sighendi is lineas guida de su guvernu e is mesuras de preventzioni de sa Regioni Sardìnnia, in matèria de sport.
RITENNIU ca is provedimentus de cunzessioni ant a èssiri provisòrius e s'at a castiai cumenti sunt andendi is datus de s'epidemia. Duncas cunsiderendi totu su chi eus nau chi est parti integranti e sustantziali
FAIT SCIRI ca est possìbili intregai is domandas po : “Rechesta po imperai a manera temporànea is impiantus sportivus comunalis po s'annu 2020/2021”.
Is domandas, in su mollu dedicau, disponìbili in su Tzentru Informacittà in Vicu Episcopio e in su giassu Internet de su Comuni http://www.comune.oristano.it, depint arribai a s'ufìtziu Protocollu Generali in Pratza Eleonora d’Arborea intru e sena sartai su 30 de làmpadas de su 2020, o cun cunsìnnia a manu o mandadas a custus indiritzus: protocollo@comune.oristano.it , o PEC istituzionale@pec.comune.oristano.it.
Si pretzisat ca intra de su 31 de argiolas ant a èssiri giadas is cuntzessionis chi ant a permìtiri de fai is atividadis inditadas in sa domanda; is impiantus sportivus aintru de is iscolas sunt cuntzèdius feti in oràriu extrascolàsticu.
Est allegau a custu avisu su Mollu de istàntzia po s'imperu de is impiantus.
Su Responsàbili de su protzedimentu est sa Dott.ssa Maria Rimedia Chergia.
Po àteras informatzionis podeis tzerriai a s'Ufìtziu Sport: tel. 0783/791311-791287 o mandai una e-mail sara.caddeo@comune.oristano.it.