Comunu de Mòguru
ECOPRIMAVERA DE DOMU
Est de su 2012 chi ònnia annu in Mòguru e in àteras biddas de s’Unioni Parte Montis, si tzèlebrat su beranu cun unu fèstival dedicau a s’ambienti. Laboratòrius, escursionis, esperièntzias faint parti de custu eventu chi acabbat cun una festa manna po totus. Ma ocannu po mori de s’emergèntzia CoVid-19, Ecoprimavera non s’est pòtzia acumpriri in sa manera e in is tempus de sèmpiri.
Difati a martzu pipus e piciocheddus chi sunt is protagonistas de custu festival ant smìtiu totu in una borta de andai a scola, logu de prus importu po bivi e partziri is esperièntzias chi pertocant s’amparu de sa terra. Sunt dèpius abarrai in domu e nosu mannus cun issus poita totu s’est firmau, de sa scola a su traballu. Ma ocannu puru su beranu est arribau cun totu sa bellesa cosa sua. E nosu sena si podi movi, eus torrau a scoberri ònnia arrinconi de domu nosta: de su giardinu in ui eus tocau sa terra a sa coxina in ui eus fatu turtas, pani, pizza imperendi is produtus de su territòriu, fintzas a is armàdius de in ui ndi eus liau su chi non imperaus prus po ndi fai àteras cosas. Totu custu dd’eus fatu impari a is pipius nostus, fillus, nebodis chi s’ant imparau cosas meda cumpartzendi cun nosu sa curiosidadi issoru.
Mancai in modalidadi “de domu”, custa ecoprimavera dd’eus afestada e eus pediu a is pipius de si mandai una fotografia de su chi fadiant ònnia dì: de is bessidas in pratza a su de fai cosa de papai a su chi fadiant po sa terra e po issus etotu. Maistus, babbus e mammas de is classis 1^A, 2^A, 3^ A, de sa scola elementari e de s’asilu ant acòlliu su cumbidu nostu mandendi-si fotografias bellas meda chi sunt serbidas a fai unu album…lèbiu e colorau cumenti est sèmpiri sa festa a s’acabbu de Ecoprimavera, chi fadeus in is primus diis de su mesi de làmpadas.
Duncas sperendi chi custa de su 2020 abarrit s’ùnica editzioni de domu de Ecoprimavera torraus gràtzias de coru a totus is chi ant pigau parti e a totus is pipius e is piciocheddus de Mòguru chi ant ammostau in is urtimus mesis fortza e passièntzia manna. Duncas a si torrai a biri a Ecoprimavera de s’annu chi benit!!!
Chi boleis biri is fotografias de is traballus, podeis intrai in su giassu de su Comunu de Mòguru.