|
|
Is programmas tv e ràdiu in sardu
Custu artìculu bolit fueddai de unus cantu trasmissionis chi podeis biri o intendi in lìngua sarda.
Nci nd’at meda, e duncas speraus de non fai afrontu a nemus si si ndi scaresceus calincuna.
· In radio studio 2000 podeis ascurtai “ Narendi e contendi” chi si fait fai unu viàgiu in mesu a is traditzionis de oi e de su tempus passau de sa Sardìnnia cun is arragordus di chi at bìviu custus acadessimentus e cun documentatzionis istòricas. Tenit fintzas sa punna de mantenni bius is dicius, cussas maneras de nai in lìngua sarda chi si sunt perdendi andendi in su tempus. Su sardu imperau est su campidanesu, cun una puntada ispetziali chi benit fata a s’inghitzu de ònnia mesi po acrarai e traduxi is fueddus prus difìtzilis.
· In Radio Super Sound, ònnia dì podeis ascurtai su notitziàriu in lìngua sarda cun is fatus acadèssius, novas de atualidadi, crònaca e informatzionis chi pertocant sa regioni nostra. Si podit ascurtai ònnia dì a custus oràrius 07:00 08:00 13:00 14:00 15:00 20:00 21:00 22:00
· In Radio Barbàgia sunt tres is trasmissionis chi si podint ascurtai in lìngua sarda: Boches de coro chi est una trasmissioni musicali, Ammentos de eri e contos de oe e su Notitziàriu in sardu
· In Radio Super Sound podeis ascurtai “A PRINTZIPIU” (Sa filosofia in sa ràdio) cun TORE CUBEDDU e ELIO TURNO ARTHEMALLE. Su programma fatu in sardu fueddat de argumentus e biografias de importu in sa stòria de su pensieru scientìficu, simplìtzi a ddus cumprendi gràtzias a unu stùdiu atentu de su linguàgiu e a una manera de ndi chistionai chi non est acadèmica e fintzas alligra. Si fueddat duncas de polìtica, ètica, religioni, scièntzia.
Ònnia mercuris de is 21 a is 21:30 – Ddu podeis torrai a intendi su domìnigu a is 8:00
· In televisioni a Videolina podeis biri Gianluca Medas chi si acumpàngiat in sa de tres stagioni de "Sentidu: Fueddus e Pentzamentus", unu viàgiu totu in lìngua sarda, andendi a connòsciri stòrias de vida. Contus chi callentant s’ànimu e perrmitint de castiai a sa vida cun unu arrisu de malinconia. "Sentidu: Fueddus e Pentzamentus" est unu progetu acumpridu gràtzias a sa lei regionali 3/2015.
· In Sardegna 1 gràtzias a su contributu de sa Regioni Autònoma de Sardìnnia podeis sighiri Addòbios de Sardigna chi agiudat a cumprendi su sentidu prus fungudu de s’ìsula nostra. Sèmpiri in custa retza si podit biri “ A babbu as biu?” dedicada a is barzeletas in sardu contadas de sa boxi de Ignazio Delìgia.
· E a s’acabu non si podeus scaresci ca nc’at fintzas una televisioni totu sarda chi si tzèrriat Eja Tv , unu logu in ui totus is sardus podint contai sa cultura e s’identidadi issoru.