"Cun su 5X1000 medas motivus bonus po agiudai sa Fondazione Oristano"
Is aristanesus e totu is chi tenint in coru s’amparu e sa valorizatzioni de su patrimòniu culturali, sa Sartiglia e su svilupu de su turismu de Aristanis, podint pigai parti destinendi su 5 po milla de s’imposta de su rèdditu de is personas fìsicas a sa Fondazione Oristano.
De su 2009 a su 2018 (su Ministeru no at ancora bogau a craru is datus de su 2019) medas funt is contribuentis chi ant giau s’agiudu insoru cumpilendi su ricuadru addatu in sa dichiaratzioni de is rèdditus e in custa manera ant assegurau prus firmesa e autonomia finantziària a sa Fondazione Sartiglia, chi oi s’est mudada in Fondazione Oristano ammanniendi su campu de atzioni cosa sua.
In dexi annus s’at arregortu 12 milla Éurus imperaus po atividadis de promotzioni e valorizatzioni de sa Sartiglia e de sa stòria, de su patrimòniu culturali e ambientali de sa tzitadi. Pròpriu po cussas ideas prus de importantis in su 2019 su Comunu d Aristanis at decidiu de aumentai is finalidadis de sa Fondatzioni Sa Sartiglia, gendi vida a sa Fondazione Oristano.
Po destinai su 5 po milla a sa Fondazione Oristano tocat a firmai su ricuadru addatu de sa dichiaratzioni de is rèdditus (730, Unico, CU) scriendi su còdixi fiscali de sa Fondazione Oristano 01096000953.
Su 5 po milla no est una tassa in prus e no est alternativa a s’8 po milla, is duas destinatzionis coesitint. Donniunu podit destinai una cuota de is impostas, chi fiant destinadas a su Stadu, su 5 po milla, a is organizatzionis no-profit po agiudai is atividadis insoru.
