Si tzèrriat “Unu mesi totus impari cun sa fantasia” e est s’initziativa de s'Assessoradu a sa Cultura de su Comunu de Aristanis a segus de proposta de sa scritora Savina Dolores Massa.
“Boleus fai bessiri a pillu sa fantasia e su cumpartzimentu de is pràtigas bonas de su bivi sa comunidadi, chi serbint a incorai is tzidatinus a cuncambiai pari pari, a incorai su sentidu de apartenèntzia e solidariedadi intru de is tzitadinus etotu chi in custa simana s'emergèntzia COVID 19 at ammenguau - narat s’Assessori a sa Cultura Massimiliano Sanna -. Gràtzias a s'idea bella de Savina Dolores Massa si incaressaus a totus is tzitadinus po pònniri in libertadi sa fantasia e giai logu a s’inventiva, bessendi a foras de domu a manera diferenti. Circaus duncas de incorai s'iscàmbiu de sentidus, de ddus contai e de afortiai s'agiudu intru de is generatzionis po fatzilitai su cunsideru e s'atentzioni po s'àteru, sa cumprensioni e sa meravìllia fintzas abarrendi atesu ma acanta in custa emergèntzia Coronavirus”.
Po pigai parti a su Mesi de sa fantasia bastat a fai prus bellus is logus in ui biveus o traballaus (gennas, fentanas, davantzalis, cancellus, portalis, iscalas, butegas mancai immoi sun serradas) cun unu sinnu, una cosa, una scrita o àteras cosas. In ònnia istrada e in ònnia domu. Cumpartziri su chi onniunu fait ònnia dì e chi immoi est imprasonau cun: cuadeddus de canna, istrumentus musicalis, pingiadas, cadiras bècias, unu mustajoni de fai totus impari in famìllia, poesias, pinturas, bicicretas immoi firmas, scateddus, brocas, froris, matas e totu su chi sa conca nostra bolit fai bessiri de domu po imprassai forti is amigus, is parentis e totus is chi s'ammancant.
Custa initziativa nascit duncas po ispainai unu messàgiu de amori, libertadi e partetzipatzioni: “Aguantai impari, cuncordai una stagioni noa, permitit de cumpartziri s'emergèntzia e si fait prus unius, sàpius, po biri su chi luxit fintzas agoa a is nuis – aciungit s’Assessori Sanna -. Aristanis e is fratzionis suas bolit e depint binci custa emergèntzia. Fintzas abarrendi in domu, arrispetendi is arrègulas e castiendi ònniunu a sa saludi sua e a cussa de is àterus, nemmus abarrat solu. Sa fantasia si podit ispainai a manera prus lestra de su virus”.
Is frutus de sa fantasia e de s'impìnniu de is chi pigant parti ant a èssiri cumpartzidus in is social e in su web.
Po pigai parti a s'initziativa tocat a cumpilai su mollu pubricau in su giassu internet de su Comunu de Aristanis e a ddu mandai impari a una pintura o fotografia de su traballu a sa mail mesecreatività@comune.oristano.it. Totus is traballus ant a bènniri pubricaus in una setzioni dedicada de su giassu istitutzionali www.comune.oristano.it.
Fait a si iscriri fintzas in sa pàgina facebook“Un mese tutti insieme con la creatività” www.facebook.com/groups/1929697587160561/ e pònniri sa fotografia ingui.
Podint pigai parti totus de su 21 de obrili a su 21 de maju.
Allegaus: