Ocannu puru su Rotary club de Aristanis, impari a su Rotaract e a is atrus duus club de servìtziu aristanesus Soroptimist e Lions, incarrerant su “Concorso Case Fiorite”, cun su patrocìniu de su Comunu da Aristanis.
S’assessori a s’ambienti Gianfranco Licheri at bòfiu pretzisai comenti custa initziativa, de importu po su dicoru de sa tzitadi, tengat cust’annu fintzas unu valori de partecipatzioni e de cumpartzidura cìvica in prus.
Nàsciu in su 2012 po promòviri sa citadinàntzia ativa e su dicoru urbanu cun sa cura de su balconi de domu, terratzus o giardinus, su cuncursu in custus annus at tentu su risultau mannu de fàiri is arrugas de Aristanis prus praxilis e armoniosas, ammanniendi s’abitudini a curai cun prus atentzioni su tretu de logu privau chi s’incarat a sa bia pùbrica.
S'iscritzioni a su cuncursu, aberta de s’11 de abrili a su 6 de làmpadas, est in donu. Is citadinus chi ant a bòlliri pigai parti ant a pòdiri cuncùrriri iscriendusì a una de is categorias
stòricas: liminaxu, balconi e terratzu o giardinu, de mudai a praxeri e segundu sa capassidadi de donniunu cun froris e matas de calisisiat tipu, o
iscriendusi a is duas setzionis noas, una dedicada a is pipius e s’atra chi premiat s’arrosa prus antiga e prus nuscosa de is giardinus aristanesus.
At a fàiri a iscriri amigus e is bixinus de domu chi cun su birdi arregalant dicoru a sa citadi e chi ant a pòdiri tenni sa merevilla de minesci e
binci unu prèmiu.
“S’emergèntzia chi seus bivendi oi s’òbrigat a passai sa mellus parti de su tempus aintru de domu e duncas si parit ancora prus de importu a promòviri sa cura e s’atentzioni de is froris chi faint bellas is domus nostas - narant is organizadoris -. In prus, su profetu chi donat a su còrpus e a su sentidu su si dedicai a sa cura de su giardinu est cosa nodia e in custa simana ancora prus est de agiudu, a su grandu stress psicofìsicu chi seus bivendi. Sa setzioni dedicada a is pipius, sempri in cust’idea, bolit donai un’atividadi chi portit arrecreu in custas diis chi seus in domu, incoragendi is prus pitius a fai un’atividadi creativa chi svilupat sa manualidadi, su sentidu po is cosas bellas e a dd’as umpratziri”.
Cust’annu su cuncursu at a èssiri amministrau on line, is chi pigant parti, ant a dèpiri tirai fotografias a is spàtzius birdis de domu insoru, e postai is fotografias in sa pàgina Facebook de su
cuncursu “CONCORSO CASE FIORITE”, o mandai is màginis cun WhatsApp a is nùmurus de telèfunu dedicaus.
Bista sa situatzioni de ecetzionalidadi chi seus bivendi, a custa editzioni ant a pòdiri pigai parti fintzas is spàtzius birdis chi non si biint a foras de is domus, giai ca non podeus bessiri me
in is bias de sa tzitadi nosta eus a atobiai su beranu in
is schermus de is smartphone e pc cosa nosta.
Cumenti a dònnia annu at a èssiri una giuria cumposta de is sòtzius de is club organizadoris e de sustenidoris de s’initziativa a decretai is bincidoris, valutendi sa calidadi de is spàtzius birdis amostaus me in is fotografias pubricadas de is chi pigant parti a su cuncursu. Sa premiatzioni est previdia po s’acabu de làmpadas: ant a èssiri assenniaus bonus po comporai de su valori de 100, 75, e 50 èurus a is primus classificaus de is tres categorias clàssicas, e prèmius specialis po is categorias noas riservadas a is pipius e a s’arrosa antiga.
Po realizai su progetu non si podit fai a mancu de sa collaboratzioni e de s’agiudu de is sponsor chi, medas cument’e sempri, sustenint su cuncursu; torraus gràtzias: Garden Casula, CRAI, Centro dei Fiori, Floricoltura Massidda, Fiori e piante Giardino Elisa, Vivaio I Campi, Frongia Market, Agros, Stilnovo La Murrina, Azienda Agricola Falchi.
Po s’iscriri bastat a pregontai a is vivàius chi pigant parti a s’initziativa, chi funt disponìbilis fintzas a cunsenniai a domu matas e froris, o mandai unu sms o telefonai a custus nùmurus de telèfunu:
- Stilnovo La murrina, Egle Spinardi +39 3477759812
- Laboratorio Orafo Renolfi, Vania Renolfi 0783 70285
- Adele Navarino +39 3283554064
