Si tzèrriat “A domu cun sa Ludoteca” e est su servìtziu nou de s'Assessoradu a is Servìtzius Sotzialis de su Comunu de Aristanis po permìtiri su gosamentu de is servìtzius ludotecàrius fintzas in custa simana de emergèntzia Coronavirus.
A cumentzai de immoi duncas is Ludotecas Comunalis ant a torrai a aberri in modalidadi "smart-working".
Sa Ludoteca virtuali est aberta a totus: pipius e piciocheddus ma fintzas a babbus, mammas, maistus, educadoris e totus cussus chi podint èssiri interessaus a connòsciri is caminus educativus propònius dae su servìtziu e bolant pigai parti a is atividadis.
In sa pàgina Facebook de is Ludotecas de Aristanis e Tzeddiani https://www.facebook.com/ludo.oristanozeddiani podeis agatai is atividadis fatas, is " video" e is fotografias de pipius e piciocheddus e àteras cosas.
Operadoras e operadoris proponint laboratòrius web, "video e tutorial" de sighiri e fai in domu cun retzetas, cosas de ligi, giogus.
“Benint fatas fintzas atividadis po grupus de pipius de ònnia ludoteca po abarrai in cuntatu e si intendi mancai a manera virtuali - ant nau is operadoras -. Unu logu o momentu at a èssiri dedicau a babbus e mammas po consulèntzia psicològica telefònica e po arraxonamentus educativus a pitzus de chistionis diversas e fintzas po leturas chi fueddant de genitorialidadi in forma virtuali”.
“S'Assessoradu bolit aberri a manera virtuali sa ludoteca po fai nasci momentus de vicinàntzia e agiudai pipius e famìllias" - narat s’Assessora a is Servìtzius sotzialis Carmen Murru.
“Is ludotecas giaint unu servìtziu de importu mannu po is minoris de Aristanis, e famìllias meda non ndi podint fai a mancu – sighit a nai s’Assessori Murru -. mandai a in antis duncas custas atividadis est una dimostratzioni de sensibilidadi po is tzitadinus piticheddus de Aristanis de parti de is servìtzius, prusatotu in s'àmbitu pedagògicu chi est de fundamentu in custa emergèntzia. Sa punna est fai ocasionis po chi sa ludoteca impari a s'iscola potzant donai momentus de crèscida e normalidadi aprontendi pipius e piciocheddus a su tempus candu sa vida at a torrai a sa normalidadi”.