Totus ant a podi imbucai a biri is films de s'Enti, chi nascit cun sa punna de aguardai sa produtzioni cinematogràfica chi pertocat sa vida e sa cultura traditzionali de sa Sardìnnia.
Fintzas s’ISRE, cumenti a meda assòtzius culturalis pùblicus e privaus e istitutzionis culturalis, po fai prus lèbia custa simana delicada at detzìdiu de pòniri a disponimentu de su pùblicu suu, a manera gratujta calincunu de is servìtzius suus.
A partiri de su 30 de martzu 2020 s’Istitutu Etnogràficu donat unu còdixi chi at a balli fintzas a su 30 de abrili 2020, po scarriai gratis totus is films de sa produtzioni cinematogràfica sua chi si podint agatai in sa piataforma on demand Vimeo. Eis a agatai films cumenti a Tempus de Baristas de David Mac Dougall, S’Àrbitru de Paolo Zucca e Sa Cena de Ignazio Figus, po ndi nai callincunu.
“S'est partu de doveri, propòniri a su pùblicu custu abbrètiu de solidariedadi digitali” at nau su cummissàriu Isre Stefania Masala. “In prus de is films de su catàlugu, in custas dis s'Istitutu Etnogràficu ponit a dispositzioni, in su giassu internet e in is piataformas social, àterus scusòrgius suus cumenti a is fotogràfias. Intru is cosas chi s'ant a podi biri minescint un'arremoni importanti is òperas “Còsima” e “Annalena Bilsini” de Grazia Deledda, allogadas in sa setzioni “rari” de sa biblioteca Isre de Nùoru e chi si podint scarriai in pdf. Sunt duncas arregallus chi s’enti fait a totus is chi, custrintus a abarrai in domu podint passai su tempus cun su stùdiu e sa connoscèntzia de sa stòria e sa cultura nostra.”
Duncas po intrai e scarriai su materiali tocat a fai aici: bastat a si registrai in sa piataforma on-line Vimeo, ponendi unu nòmini e una mail de cuntatu, e a pustis s' at a scioberai unu film de su catàlugu ISRECINEMA on demand (si brintat de su www.isresardegna.it), s'at a clicai su tastu RENT e poni aintru su còdixi de promotzioni SRE2020. E aici s'at a pòdiri biri su film.
Castia innoi su catàlugu
https://vimeo.com/isrecinema/vod_pages/sort:alphabetical/format:detail