Agatai respustas chi andint beni e apretosas po s'economia chi s'at a dèpiri agiudai candu s'emergèntzia sanitària at a passai. Sa Sardìnnia cumenti totu su mundu est bivendi unu tempus lègiu meda siat sanitàriu siat sòtziu econòmicu e duncas est netzessàriu chi totus is chi tenint una responsabilidadi de arrolu fatzant interventus chi siant in cuncòrdia cun cussus aprontaus dae su stadu e dae is regionis impari a cussus chi ant a èssiri fatus dae is àteras istitutzionis cumenti is càmeras de cummèrtziu. Custu est s'argumentu chi ant portau in chistioni a manera telemàtica is cuatru Presidentis de is Càmeras de Cummèrtziu sardas chi si sunt postus a pari cun su presidenti de sa Cummissioni regionali po is atividadis produtivas, su cunsigeri regionali Piero Maieli, po scioberai immoi etotu is interventus a benefìtziu de is impresas sardas.
Punna de totus est: istrantziri chi fintzas in campu econòmicu bengiat apricau su printzìpiu de s’”immunità di gregge”: non si podit ammiti su sparessimentu de is sugetus prus dèbbilis. Su sistema econòmicu nostru est giai dilicau e tenit abisòngiu de èssiri tutelau dae un acuntessimentu non prevididu e aici grai chi at cambiau totus is arrègulas e iscancellau totu is seguresas. Is impresas nostras non podint èssiri lassadas solas e sena armas de supravivèntzia in mesu a custa gherra chi non connoscit làcanas, territòriu, setori.
“Su cuadru generali
chistionat de una suferèntzia forti chi nd'at a bènniri po totus is cumpartus e is filieras de s'economia isulana – ant nau Agostino Cicalò (Nuoro), Nando Faedda (Aristanis), Maurizio de Pascale
(Casteddu) e Gavino Sini (Sassari)- serbint interventus apretosus , eficatzis e detzidius cun su Stadu, cun is Regionis , entis e istitutzioni pùblicas e privadas po giai is arrespustas chi
serbint fadendi luegu unu blocu de is costus e donendi apustis unu agiudu finantziàriu in manera chi is atividadis sigant a bivi fintzas a sì'acabbu de sa crisi e potzant torrai a partiri
impressi. “
Sa Regioni at giai aprontau calincunu interventu, prima de totu sa lei n.8 de su 2020 po sa filiera turìstica, ascurtendi is rechestas e pighendi sa strada giusta po amparai is impresas po su chi
pertocat su costu de su traballu e is dipendentis issora , cun interventus de arrecumpènsas cumenti a sa “cassa integrazione in deroga”. Is presidentis de is càmeras de Cummèrtziu ant pregau e
pediu a su cunsigeri Maieli chi is provedimentus bengiant cuncordaus e ativaus luegu.
In tempus de paxi arrègulas de paxi, in tempus de gherra còdixi de gherra. Duncas amminguai sa burocratzia prusatotu.
“Intendeus a manera forti is dificultadis chi is imprenditoris nostrus sunt bivendi – at nau Piero Maieli – totus is domandas chi eus giai ascurtau e chi oi in su cunfrontu cun is càmeras de
Cummèrtziu sardas sunt benidas a foras in manera ancora prus crara, minescint de agati respustas. Sigu de acanta cumenti sa situatzioni s'est sboddiendi ap 'a ascurtai in manera fitiana is
consillus prus giustus e m'apa a movi po giai sceda a totus luegu. Duncas màssimu imipìnniu e màssimu de is resursas po tenni bia s'isperàntzia e costruiri sa siguresa de sa
ripartèntzia.”